«Վիվա-ՄՏՍ»-ը հանվել է վաճառքի․ ովքե՞ր են հավանական գնորդները
ՀԱՍԱՐԱԿՈՒԹՅՈՒՆՀայաստանում ավելի քան 20 տարի գործող «Վիվա-ՄՏՍ» ընկերությունը հանվել է վաճառքի: 2 տարուց ավելի է կողմերը բանակցում են առքուվաճառքի գործարքի շուրջ: Այսօր արդեն դիմել են կարգավորող հանձնաժողովին վաճառքն իրականացնելու նպատակով: «Վիվա ՄՏՍ»-ի բաժնետերը Կիպրոսում գրանցված Aramayo Investments Limited ընկերությունն է։ Նախկինում այս ընկերությունում 20 տոկոս բաժնեմաս ունեին լիբանանցի Պիեռ և Մուսա Ֆատուշ եղբայրները, մյուս 80 տոկոսը պատկանում էր ռուս միլիարդատեր Վլադիմիր Եվտուշենկովին՝ Լյուքսեմբուրգում գրանցված Allegrato Holding SARL ընկերության միջոցով։
«Վիվա-ՄՏՍ» ընկերությունը Հայաստանում ունի դրական համբավ և՛ որպես առաջատար բիզնես, և՛ որպես մեծ ներդրում ունեցող ընկերություն տնտեսության մեջ: Տարօրինակ է, որ հանձնաժղովը լրատվականների այն հարցին, թե ովքեր են հավանական գնորդները, չի պատասխանում: Սա օրենքի կոպիտ խախտում է և չի կարող վաճառքի գործընթացը հրապարակային չլինել: Հանրությունն առնվազն իրավունք ունի իմանալու, թե ում բաժանորդն է լինելու:
Ըստ լրատվականի տեղեկությունների՝ Հայաստանյան «Վիվա-ՄՏՍ»-ը հավանական գնորդը ռուսական բուքմեյքերական ընկերություն 1Xbet-ի սեփականատերերն են՝ Ռոման Սեմյոխինը, Դմիտրի Կազորինը և Սերգեյ Կարշկովը։
1Xbet-ը այնքան էլ բարի համբավ չունի ո՛չ աշխարհում և ոչ էլ Ռուսաստանում: Սովորական բուքմեյքերական ընկերություն է, որը ընդունում է խաղադրույքներ, ունի նաև լայվ խաղատուն և Եվրոպայում տարածված ցանց: 1xbet-ը հովանավոր է մի շարք ֆուտբոլային գրանդ ակումբների, ինչպիսիք են «Բարսելոն»-ը, «Պարիս Սեն Ժերմենը, «Չելսին», «Լիվերպուլ»-ը և այլ թիմեր։ Կա կարծիք, որ «Վիվա-ՄՏՍ»-ը գնում է այսպես ասած «գումարներ լվանալու համար»: Հավանական է նաև, որ գնման գործընթացին կմասնակցի նաև ռուսական «Գազպրոմ» ընկերությունը:
Աննա Ավետիսյան