«Քաղպայմանագրի» ագրեսիվ վարքը սրվում է
ՎԵՐԼՈՒԾՈՒԹՅՈՒՆՆԵՐ
«Քաղաքացիական պայմանագիր» կուսակցության վերջին օրերի ագրեսիվ վարքը վկայում է, որ այդ կուսակցությունում արդեն իրենք էլ չեն հավատում հաղթանակին և փորձում են կռիվներ սադրելով, ահաբեկելով քաղաքական ընդդիմախոսներին զավթել իշխանությունը Երևանում։
Վերջին մի քանի օրվա ընթացքում առնվազն մի քանի դեպքեր են եղել, երբ ՔՊ-ական ակտիվը հարձակում է գործել ընդդիմախոսների վրա։ Մալաթիայում ոստիկանությունը տասնյակ մարդկանց է տեղափոխել ոստիկանության բաժիններ, ընդ որում ակնհայտ է, որ իրավապահներին հստակ հրահանգ է տրված պատժել բոլորին, ովքեր փորձում են ընդդիմանալ և իրենց ձայնը բարձրացնել։
Երեկ էլ, երբ ջուր էին լցրել Ազգային ժողովի նախագահ Ալեն Սիմոնյանի վրա, նա պարզապես տեսախցիկների առաջ ոստիկաններին հրահանգում էր պատժել իր բողոքի ձայնը բարձրացրած կնոջը։ «Քաղպայմանագրի» ագրեսիան դրսևորվում է ոչ միայն փողոցում մարդկանց հետ ձեռնամարտերով, այլ նաև սոցիալական ցանցերում և մամուլում։
Ակնհայտորեն վերջին շրջանում ՔՊ ներկայացուցիչներն այլևս ձևակերպումների վրա մտածելու ջանքեր չեն գործադրում, անվանարկում, վիրավորում և վարկաբեկում են։ Տասնյակ ֆեսբուքյան էջեր, որոնք նախկինում ակտիվ չեն եղել, այս օրերին հստակ հակաքարոզչություն են իրականացնում Տիգրան Ավինյանի մրցակիցների հասցեին։ Թերևս հրապարակվող հարցումները վկայում են, որ «Քաղպայմանագիրը» լուրջ խնդիրներ է ունենալու Երևանի ավագանու ընտրություններում, անգամ եթե վարչական ռեսուրս կիրառի, կամ ընտրակաշառք բաժանի, ուստի և չենք բացառում, որ մինչև ընտրությունները կռիվներն ու ծեծն ավելանան, իսկ ընտրությունների օրն ականատես լինենք ընտրատուփեր գողանալու կամ վառելու դեպքերի։
Գայանե Խաչիկյան
