Երևանի տնկարանային տնտեսությունը առաջիկայում կհամալրվի 40 հազար վայրագ և արդեն պատվաստված փոքր տնկիներով
ՀԱՍԱՐԱԿՈՒԹՅՈՒՆ
Երևան քաղաքի տնկարանային տնտեսության արդիականացման ծրագրի շրջանակներում տնկարանի ցանկապատի անցկացման աշխատանքները կատարված են մոտ 70 տոկոսով: Տարածքում մայիսի սկիզբին պլանավորվում է տնկել մոտավորապես 20-30 հազար վայրագ տեսակի և շուրջ 10 հազար արդեն պատվաստված փոքր տնկիներ:
Այս մասին Երևանի քաղաքապետարանի գործակարգավարական խորհրդակցության ժամանակ նշեց «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանն՝ ընդգծելով, որ Ռուսաստանից 3D ցանկապատի ներկրման հետ կապված բարդությունների պատճառով այն մի փոքր ուշանում է: Առաջիկա շաբաթվա ընթացքում արդեն սպասվում է 3D ցանկապատների ներկրումը, դրանից հետո աշխատանքները 15-20 օրվա մեջ կմոտենան ավարտին:
«Տնկարանային տնտեսության մասով ամբողջովին ավարտված է ջրամբարի կառուցման աշխատանքները, ինչպես նաև հողի գրունտի փխրեցման և հողախառնուրդով խառնման աշխատանքները: Այժմ մեկնարկում են պոմպակայանի պոմպերի և ֆիլտրացիոն համակարգերի տեղադրման աշխատանքները: Բոլոր սարքավորումները ձեռք են բերված, նաև ձեռք է բերվել 100 կմ կաթիլային համակարգ, կսկսենք բուն կաթիլային համակարգի անցկացման աշխատանքները: Նաև կմեկնարկի մոտ 2 հեկտար տարածքի ստվերացնող համակարգի աշխատանքները:
Ֆինանսական վարչությունից ստացվել է գումարի կեսը, մյուս կեսը ստանալուն պես կսկսենք այդ նյութերի գնման գործընթացները»,-ասաց նա:
Քաղաքապետի այն հարցին, թե երբ է պլանավորվում տնկիների տեղադրումն այդ հատվածում և ինչ քանակով, Բեգոյանը պատասխանեց. «Պլանավորում ենք ապրիլի վերջ, մայիսի սկիզբ: Այժմ գնումների հայտարարման փուլն է՝ մոտավորապես 20-30 հազար վայրագ տեսակի և շուրջ 10 հազար արդեն պատվաստված տեսակի փոքր տնկիներ»:
Բեգոյանը նշեց, որ նախատեսում են ջերմոցատնկարանային տնտեսությունում աճեցնել կաղնիներ, սոսիներ, թխկիներ և ևս մի քանի տեսակներ՝ ընդգծելով, որ Երևանում օգտագործվելու են խիստ ֆունկցիոնալ և արժեքավոր ծառատեսակներ:
«Երևան քաղաքի ծառերի գրեթե կեսը կորցրել կամ կորցնում է իր կենսունակությունը: Այդ իսկ պատճառով անհրաժեշտ կլինի առաջիկա 10 տարիների ընթացքում անընդհատ փոփոխման աշխատանքներ կատարել: Դրա համար մենք առաջարկում ենք ջերմոցում ունենալ այնպիսի հզորություններ, որ տարեկան կարողանանք արտադրել 5 հազար ծառ: Դա վերաբերում է հասուն ծառերին, որոնք բերվելու են փողոցային տնկարկներ և այգիներ»,-ասաց «Կանաչապատում և շրջակա միջավայրի պահպանություն» ՀՈԱԿ-ի տնօրենը:
