Անմոռանալի Վարդավառ ենք ունենալու

Ինչպես գրել էինք, համահայկական Վարդավառ է նախատեսվում Գյումրիում: Փառատոնը կազմակերպվել է Զբոսաշրջության եւ քաղաքաշինության բարեգործական հիմնադրամի (TUF) կողմից, ՀՀ Էկոնոմիկայի նախարարության զբոսաշրջության կոմիտեի օգնությամբ և Գյումրու համայնքապետարանի աջակցությամբ:

Ազգային պարեր և խաղեր, Վարդավառի ավանդական ջրախաղ, մանկական և սպորտային խաղերի մրցույթ, երաժշտություն, ազգային խոհանոցը ներկայացնող ուտեստների համտես և երեկոյան ռիթմիկ երաժշտություն․ այս ամենը տեղի կունենա «Վարդավառ-փառատոնի» շրջանակում հուլիսի 6-ին և 7-ին՝ Գյումրու Բարեկամության զբոսայգում:

Հուլիսի 4-ին կազմակերպված մամուլի ասուլիսի շրջանակներում Բարեկամության այգու վերակառուցման ծրագրի համակարգող Էմմա Բաղդասարյանը, զբոսաշրջության կոմիտեի մամուլի քարտուղար Անահիտ Բաղդասարյանը, համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը մանրամասն անդրադարձել են փառատոնին, դրա շրջանակներում կազմակերվող ծրագրերին, համագործակցություններին, աջակցություններին և կազմակերպչական մի շարք հարցերի.

«Ամենալավը Գյումրիում էր հնարավոր Վարդավառը նշել, որովհետև առաջին տարին չէ, որ Գյումրին մեծ, մասշտաբային միջոցառման է վերածում Վարդավառը:  2019 թվականից ունեցել ենք փորձ և փորձառություն համաքաղաքային տոնի վերածելու և բոլորի բակերում խաղացվող այս ավանդական, ջրային խաղը տեղափոխել քաղաքի կենտրոնական հատվածներ: Ամեն ինչ սկսվեց Վարդանանց հրապարակից, անցած տարի փորձարկել ենք նաև Մայր Հայաստան հուշահամալիրի տարածքը: Ի ուրախություն մեզ՝ Բարեկամության այգին շատ կարևոր կենտրոնի է վերածվում Գյումրիում և համայնքապետարանի լավագույն գործընկերներից է: Եթե սրան գումարում ենք այն բարեկամական փոխգործակցությունը, որ մշտապես ունեցել ենք Բարեկամության այգու հետ՝ կարելի է ասել, որ ստացված համագործակցության արդյունքում անմոռանալի Վարդավառ ենք ունենալու»,-ավելացրել է Լ.Թովմասյանը: 

Լ.Թովմասյանն այնուհետ նաև նշել է, որ համայնքապետարանը չի խախտի արդեն իսկ ձևավորված ավանդույթը, տոնական օրվա մեկնարկը կտրվի արձանների լվացման գործընթացով: 

Օրվա շրջանակներում համայնքապետարանը տրամադրել է ջրցան մեքենաներ: