Բանակում հոգեկան խնդիրներ ձեռք բերած Արթուրին ծեծել է հարբած հրամանատարը. քրգործը կարճվել է
ՊԱՏՄՈՒԹՅԱՆ ԱՅՍ ՕՐԸԲանակում ծեծվելու հետեւանքով հոգեական խնդիրներ ձեռք բերած Արթուր Հակոբյանին ծեծի ենթարկելու վերաբերյալ հարուցված քրեական գործը կարճվել է հանցադեպի բացակայության պատճառով: ՀՀ քննչական կոմիտեի զինվորական քննչական գլխավոր վարչության 9-րդ կայազորային քննչական բաժնում հարուցվել էր քրեական գործ՝ զինվորական ծառայության պարտականությունները կատարելու կապակցությամբ ստորադասին ծեծելու դեպքի առթիվ, 2015թ. նոյեմբերի 13-ին որոշում էր կայացվել քրեական գործ հարուցելու մասին, իսկ զինծառայող Արթուր Հակոբյանը ճանաչվել էր տուժող:
NEWS.am-ի հետ զրույցում Արթուրի հարազատները նշեցին, որ իրենց տեղեկացրել են, որ գումարտակի հրամանատար Ջիվան Մկրտչյանը, որն Արթուրի պատմելով իրեն ծեծի է ենթարկել, կապ չունի նրա ձեռք բերած հիվանդության հետ եւ բավականաչափ ապացույցներ չկան Արթուր Հակոբյանի պատմածները հիմնավորելու համար:
Մինչդեռ հարազատները վստահ են, որ Արթուր Հակոբյանին ծեծի են ենթարկել հենց բանակում եւ պատահական չէ, որ Արթուրն անընդհատ իր գումարտակի հրամանատար Ջիվան Մկրտչյանի անունն է տալիս նոպաների ժամանակ, վախենում է նրա անունը լսելիս: Արթուրի հարազատները նշում են, որ քննչական կոմիտեն կոծկել է գործը, բայց իրենք պայքարելու են, քանի որ Արթուրը բանակ է գնացել առանց առողջական խնդիրների, իսկ վերադարձել` հոգեկան խնդիրներով:
Արթուր Հակոբյանը 2015թ. նոյեմբերի 6-ին հոգեկան խնդիրներով Երեւանի կայազորային հոսպիտալ էր տեղափոխվել: Արթուրն ու նրա հարազատները պնդում են, որ զինծառայողին բանակում ծեծել է գումարտակի հրամանատար Ջիվան Մկրտչյանը՝ հարբած վիճակում, որի հետեւանքով էլ ձեռք է բերել առողջական խնդիրներ:
Նշենք, որ 19-ամյա Արթուր Հակոբյանը, թեեւ հոսպիտալից տուն է տեղափոխվել, բայց չի ապաքինվել. պարբերաբար ուշագնաց է լինում, սրտխառնոցներ ունենում: Արթուրին լուրջ հետազոտություն եւ բուժում է հարկավոր, սակայն, ընտանիքը բավականաչափ գումար չունի:
Արթուրին օգնել ցանկացողները կարող են զանգահարել նրա հորաքրոջը Ռիտա Հակոբյանին՝ 093898783 հեռախոսահամարով: