Դեֆիցիտ և խուճապ. Հայաստանում ինչու՞ հեղուկ գազի գները բարձրացան

Եթե ​​դոլարի և ռուբլու փոխարժեքները շարունակեն ամրապնդվել, դա կարող է լրացուցիչ ռիսկեր ստեղծել Հայաստանում վառելիքի գների հետագա բարձրացման առումով։ Հայկական շուկայում հեղուկ գազի թանկացումը պայմանավորված է ինչպես արտաքին, այնպես էլ ներքին գործոններով, Sputnik Արմենիայի թղթակցի հետ զրույցում ասել է ՀՅԴ Բյուրոյի տնտեսական հետազոտությունների գրասենյակի ղեկավար, տնտեսագետ Սուրեն Պարսյանը, գրում է dzen.ru-ն։

«Հիմնական արտաքին գործոնը գազի համաշխարհային գների բարձրացումն է, որը հասել է 1000 խմ-ի դիմաց 600 դոլարի, ինչը 30 տոկոսով ավելի է, քան տարեսկզբին, ինչը բերել է շուկայում դեֆիցիտի ու խուճապի, ցավոք սրտի, որոշ ներկրողներ օգտվում են այս իրավիճակից արհեստականորեն թանկացնելով գազը»,- պարզաբանել է Պարսյանը։

Տնտեսագետն ընդգծել է, որ վառելիքի թանկացման վրա էական ազդեցություն ունի նաև ներքին իրավիճակը։ «Օբյեկտիվ պայմաններ, իհարկե, կան, բայց թանկացման հիմնական պատճառը խուճապն է և տնտեսվարող սուբյեկտների կողմից լրացուցիչ շահույթ ստանալու ցանկությունը»,- նշել է նա։

Պարսյանը հիշեցրել է, որ այս տարվա մայիսին հեղուկ գազի գները հասել էին ռեկորդային ցածր մակարդակի՝ 60-70 դրամ մեկ լիտրի դիմաց։ Սա հանգեցրել էր սպառման զգալի աճի, քանի որ շատ մեքենաների սեփականատերեր իրենց մեքենաները փոխակերպել էին այդ գազով աշխատելու: Արդյունքում շուկան ավելի է կենտրոնացել: Նախկինում գործող մոտ 90 ընկերություններից շատերը դադարեցրել են իրենց գործունեությունը չկարողանալով դիմակայել մրցակցությանը:

Տնտեսագետը քննադատել էր նաև Հանրային ծառայությունները կարգավորող հանձնաժողովին, որը պետք է վերահսկի շուկան։

«Հանձնաժողովն անգործության է մատնված ասելով, որ շուկայում գերիշխող խաղացող չկա, և, հետևաբար, իրենք միջամտելու պատճառ չունեն»,- հավելել է նա։

Կանխատեսումների վերաբերյալ Պարսյանը նշել է, որ համաշխարհային շուկայում գազի գնի նոր թանկացման պայմաններ դեռ տեսանելի չեն։ Սակայն, եթե դոլարի և ռուբլու փոխարժեքները շարունակեն ամրապնդվել, դա կարող է լրացուցիչ ռիսկեր ստեղծել Հայաստանում վառելիքի գների հետագա բարձրացման առումով։

Նյութը հրապարակման պատրաստեց Կամո Խաչիկյանը

www.1or.am