ԵՄ պատժամիջոցներ, ՀՀ քաղաքացիություն, Կադիրով. ինչպե՞ս է ապրում Միխայիլ Գալուստյանը

Դերասան, կատակերգու Միխայիլ Գալուստյանը պատժամիջոցների 16-րդ փաթեթի շրջանակում հայտնվել է Եվրամիության սև ցուցակում, փաստաթուղթը հրապարակել է Եվրոպական խորհրդի մամուլի ծառայությունը։ Ինչպե՞ս է դրան արձագանքել Գալուստյանը  և ինչպե՞ս է ապրում հիմա, գրում է news.ru–ն։

Իսկ ինչո՞ւ Գալուստյանն ընդգրկվեց ԵՄ պատժամիջոցների ցուցակում: Ընդհանուր առմամբ, ԵՄ-ն համաձայնել է պատժամիջոցների ցուցակում ներառել 48 անձանց և 35 կազմակերպությունների, որոնք «պատասխանատու են այն գործողությունների համար, որոնք խաթարում կամ սպառնում են Ուկրաինայի տարածքային ամբողջականությանը, ինքնիշխանությանը և անկախությանը»։ Գալուստյանին, փաստորեն, մեղադրում են դրանում:

2019 թվականին Գալուստյանն ավելացվել է ուկրաինական «Mirotvorets» կայքի տվյալների բազա 2014 թվականից հետո Ղրիմ այցելելու կապակցությամբ։ 2023 թվականի հունվարին Ուկրաինան 10 տարի ժամկետով պատժամիջոցներ է սահմանել Գալուստյանի և մի շարք այլ ռուս մշակութային գործիչների նկատմամբ։ Փետրվարին Կանադան նույնպես սահմանափակումներ է մտցրել շոումենի նկատմամբ։

Այնուամենայնիվ, դերասանի խոսքով ԵՄ-ի որոշումն իր համար անակնկալ է եղել։ Հումորիստը նշել է, որ ուրախություն է պատճառել մարդկանց, բայց ի վերջո դարձել է հալածանքի զոհ։ «Մենք շատ ենք, երամ ենք։ Դուք չեք կարող մեզ բոլորիս փակել: Դուք պետք է հոգ տանեք ձեր քաղաքացիների մասին: Մենք, անպայման նորից կտեսնվենք», - ընդգծել էր Գալուստյանը հավելելով, որ եվրոպացի քաղաքական գործիչներին «ուրիշ բան անել չի մնացել», եթե նրանք սկսել են պատժամիջոցներ կիրառել դերասանների և կատակերգուների նկատմամբ։

Իսկ ի՞նչ է ասել Գալուստյանը Հատուկ ռազմական գործողության մասին: Հումորիստն ակտիվորեն ցուցադրել է իր քաղաքական դիրքորոշումը, օրինակ 2012 և 2018 թվականներին նախագահական ընտրությունների ժամանակ մասնակցել է Վլադիմիր Պուտինին աջակցելուն։ 2022 թվականի օգոստոսին ՌԴ ՊՆ-ն հրապարակել էր Գալուստյանի վիդեո շնորհավորանքը ռազմական օդաչուներին։

«Աշխատեք, եղբայրներ։ Մենք իսկապես հպարտ ենք ձեզնով», - հայտարարել էր Գալուստյանը։ Նա նաև ասել էր, որ ուկրաինական իրադարձությունները կազմակերպել են նրանք, ովքեր ցանկանում են թուլացնել Կիևն ու Մոսկվան և երկրներին միմյանց դեմ հանել։

«Կարծում եմ, որ ուկրաինացի ժողովուրդը կկարողանա հասկանալ, թե ինչ դաժանությամբ են իրեն կանգնեցրել Մայդանում, դուրս կքշի իր օլիգարխներին, ովքեր հրաման են տալիս սպանել խաղաղ բնակիչներին, և կրկին կկարողանա ապրել խաղաղության մեջ միմյանց և մեզ հետ», - ասել էր կատակերգուն:

Սակայն երկրպագուներին շփոթեցրել է այն փաստը, որ 2023 թվականի ապրիլի սկզբին Գալուստյանը հանկարծակի ստացել է երկրորդ քաղաքացիությունը՝ Հայաստանի։ Նրանք սկսել են կասկածել, որ կատակերգուն պատրաստվում է արտագաղթել:

«Տեսնում եմ, որ լրատվամիջոցները խուճապի մեջ են, որ ես Հայաստանի քաղաքացիություն եմ ստացել։ Ուզում եմ հասկացնել, որ թյուր մեկնաբանություններ չլինեն»,- ասել է Գալուստյանը հավելելով, որ Հայաստանը համարում է իր պատմական և էթնիկ հայրենիքը։ «Սկզբունքորեն, ավելորդ մեկնաբանությունների կարիք չկա։ Բայց դեռ, հանգստացեք: Ես սիրում եմ Ռուսաստանը և որոշ մարդկանց նման չեմ հեռանում այստեղից: Ես այստեղ ունեմ շատ ընկերներ, աշխատանք, պայմանագրեր, երկրպագուներ: Ռուսաստանն իմ հայրենիքն է, վերջակետ»,- ասել է դերասանը խոսելով իր երկրորդ քաղաքացիության մասին։

Գալուստյանը 2016 թվականի նոյեմբերին ՈւՀԱ-ի հոբելյանական թողարկման ժամանակ ծաղրերգել էր Չեչնիայի ղեկավարին։ Իր պարոդիայում կատակերգուն շնորհավորել էր հաղորդավար Ալեքսանդր Մասլյակովին Ռամզան Կադիրովի կերպարով շոուի 55-ամյակը վարելու կապակցությամբ։ 2023 թվականին Գալուստյանը խոստովանել է, որ Կադիրովն ինքն է օգնել իրեն ստեղծել քաղաքական գործչի պարոդիան։ «Երբ ես անում էի այս պարոդիան ՈւՀԱ-ում, ես կապ հաստատեցի Ռամզան Ախմատովիչի հետ և խոստովանեցի, որ նման միտք ունեմ: Ես հարցրեցի, թե ինչպե՞ս լավագույնս դա անել, քանի որ ինձ ավելի շատ նյութ էր պետք, այսպես ասած, ավելի ճշգրիտ»,- ասել է նա: Գալուստյանի խոսքով, Կադիրովը համաձայնել է օգնել իրեն, քանի որ իրեն համարում է ադեկվատ մարդ ու հումորի պրոֆեսիոնալ։ Ավելի ուշ քաղաքական գործիչը հավանություն է տվել Գալուստյանի ելույթին։ Չեչնիայի ղեկավարը պարոդիան անվանել է զիլ և նշել, որ ինքը «սրտանց ծիծաղել է»։

2024 թվականի հունիսին Գալուստյանը Instagram-ում կոլաժ էր տեղադրել ցույց տալով, որ նկատելիորեն նիհարել է։

«Ի՞նչ է պատահել, Գալուստյան»,— ստորագրել է նա իր հրապարակումը։ Համացանցի օգտատերերն արձագանքել են շոումենի արտաքինի փոփոխություններին և նշել, որ նրա նիհարությունը նրան ավելի մեծի տեսք է տալիս։

«Ինչո՞ւ ես այդքան նիհարել», «Նիհարությունը ձեզ ավելի մեծ է դարձնում», «Նախկինում ավելի լավ էր»,- ասել են երկրպագուները։

Հոկտեմբերին «ԿՊ-Սանկտ Պետերբուրգ»–ը հայտնել էր, որ Գալուստյանը նիհարել է 14 կգ: Հումորիստը հայտնվել է «Ժիյզն» նախագծի պրեմիերային, որում նա գլխավոր դերն է կատարել։ Հրատարակությունը նշել է, որ շատ երկրպագուներ չեն ճանաչել կատակերգուին։ Ինքը՝ Գալուստյանը, խոստովանել է, որ սկսել է ճիշտ սնվել և մարզվել։ Բացի այդ, դերասանը սկսել է նկարահանումների գնալ ֆիթնես գորգով։

Դերասանի խոսքով որոշ ժամանակ իրեն դուր է եկել հայելու մեջ իր արտացոլանքը, սակայն բժիշկներն են ստիպել նիհարել, այլ ոչ թե նախկին կազմվածքին վերադառնալու ցանկությունը։

«Ես նույնիսկ վայելում էի այն փաստը, որ ես այդքան հաստլիկ էի, մի տեսակ խարիզմատիկ պանդա: Հետո մի քիչ դժվարացավ: Ես հասկացա, որ չեմ պատրաստվում արմատապես նիհարել։ Սկսեցի սահուն շարժվել ճիշտ ուղղությամբ: Ես գնացի բժշկի, ինձ մոտ ախտորոշեցին առաջին կարգի գիրություն, և սկսեցին ստուգել շաքարախտի համար՝ գլյուկոզայի մակարդակը, ենթաստամոքսային գեղձը, խոլեստերինը: Նրանք դեղեր նշանակեցին, որոնք ես սկսեցի ընդունել», - բացատրել է Միխայիլը:

Նյութը հրապարակման պատրաստեց Կամո Խաչիկյանը

www.1or.am