Քանի՞ հոգի է ժամանել թանգարան Անահիտ աստվածուհու կիսանդրին տեսնելու համար

Մայրության, պտղաբերության, արգասավորության, ծննդաբերության, վաղ շրջանում՝ նաև ռազմի աստվածուհի աստվածուհի Անահիտի կերպարը ոչ միայն Հայաստանում է իր արտացոլումը գտել, այլև այլ ժողովուրդների դիցարաններում, մասնավորապես պարսկականում՝ Անահիտային, հունականում՝ Արտեմիսին, հռոմեականում՝ Դիանային, եգիպտականում՝ Նիիթին։

Նավասարդի սկզբին (օգոստոսի 11-ին) մեծ շուքով նշվում էր Անահիտի գլխավոր տոնը՝ կապված բերքի հասունացման հետ։ Տոնախմբությունները վերածվում էին պտղաբերության տոնի, որի ժամանակ բազմաթիվ ուխտավորներ էին հավաքվում Անահիտին նվիրված մեհյանների շուրջը։ Ծիսակատարությունները ուղեկցվում էին աղոթքներով, երգերով, խնջույքներով։ Քրիստոնեության հաստատումից հետո Անահիտի պաշտամունքը վերածվում է Մարիամ Աստվածածնի պաշտամունքի։ Նրա անունով էր կոչվում հայկական հեթանոսական տոմարի ամիսների 19-րդ օրը։

Անահիտ աստվածուհու պաշտամունքը Հայաստանում առաջացել է Պարսկական Աքեմենյան ժամանակներից և սերտորեն կապված է եղել մայր ծնողի հանդեպ հարգանքին։ Վաղ շրջանում եղել է նաև հայկական դիցարանի ռազմի աստվածուհին։ Նրան կոչել են Ոսկեմայր, Սնուցող մայր, Մեծ տիկին, Ոսկեծղի, Ոսկեմատն։ Անահիտը համարվել է խոհեմության ու պարկեշտության մայրը, մարդկանց սնուցող, ապրեցնող ու փառավորող աստվածուհի։

Քանի որ Անահիտը մեծ դեր է ունեցել հայերի կյանքում, առօրյայում և առհասարակ, աստվածուհու բռոնզաձույլ արձանը Բրիտանյայից առաջին անգամ բերվել էր Հայաստան, որն իր հանգրվանը գտել էր Հայաստանի պատմության թանգարանում՝ այլ արվեստի գլուխգործոցների կողքին։

Աստվածուհու արձանը թանգարանում ներկայացված է եղել «Մայր աստվածություն․ Անահիտից Մարիամ» ցուցադրության շրջանակում։

Ապրիլի 10-ին աստվածուհու բռոնզաձույլ արձանը լքեց Հայաստանի պատմության թանգարանը՝ գուցե հետ վերադառնալու խոստումով։

ArmLur.am-ը տեղեկացավ, որ աստվածուհու արձանը տեսնելու համար թանգարան է ժամանել 55 հազար 837 քաղաքացի, այդ թվում՝ դպրոցահասակ երեխաներ։ Մինչև 12 տարեկան երեխաների մուտքը թանգարան եղել է անվճար։