Կառավարությունը դեմ է Մարտի 1-ը հիշատակի օր հռչակելուն. գործադիրի պարզաբանումը
ՔԱՂԱՔԱԿԱՆՈՒԹՅՈՒՆՀՀ կառավարության առաջիկա նիստում բացասական եզրակացություն կտրվի ԱԺ պատգամավորներ Լեւոն Զուրաբյանի, Ստեփան Դեմիրճյանի, Արամ Մանուկյանի, Գագիկ Ջհանգիրյանի կողմից ներկայացված օրենքի նախագծին, որով առաջարկվում է լրացում կատարել «Հայաստանի Հանրապետության տոների եւ հիշատակի օրերի մասին» ՀՀ օրենքում եւ մարտի 1-ը նշել որպես 2008 թվականի մարտի 1-ի զոհերի հիշատակի եւ պետական ահաբեկչության ու բռնաճնշումների դեմ համազգային բողոքի օր: Նախագիծն ընդգրկված է Կառավարության առաջիկա նիստի օրակարգում:
««Հարկ ենք համարում նշել, որ նախագիծը հիմնված է քաղաքական գնահատականների վրա: Մասնավորապես՝ նախագծի հիմնավորման համաձայն «թեև ֆորմալ առումով շարունակվում է մարտի 1-ի սպանությունների գործով նախաքննությունը, սակայն, ըստ էության դրանցով վարույթը կասեցված է և հանցագործների բացահայտմանն ուղղված քննչական գործողություններ, օպերատիվ հետախուզական միջոցառումներ փաստորեն չեն կատարվում»: Այսինքն՝ նախագիծը քաղաքական գնահատական է տալիս իշխանությունների, դրա առանձին մարմինների աշխատանքին եւ արդյունքում առաջարկում է իրավական լուծում, որը սկզբունքորեն չի համապատասխանում այն օրենքի տրամաբանությանը, որում առաջարկվում է փոփոխություն կատարել: Նախագծում կիրառվում է նաև «պետական ահաբեկչություն» հասկացությունը, որը նախատեսված չէ Հայաստանի Հանրապետության օրենսդրությամբ: Ելնելով շարադրվածից, Հայաստանի Հանրապետության կառավարությունը գտնում է, որ նախագծի ընդունման հիմքերը բացակայում են և դեմ է ներկայացված օրենքի նախագծի ընդունմանը»,- ասվում է ԱԺ նախագահ Գալուստ Սահակյանին ուղղված պատասխանի նախագծում, որ տեղադրված է Կառավարության կայքում:
Նշենք, որ ՀԱԿ խմբակցության պատգամավորների ներկայացրած նախագծով առաջարկվում է 2008 թվականի մարտի 1-ը նշել զոհերի հիշատակի եւ պետական ահաբեկչության ու բռնաճնշումների դեմ համազգային բողոքի օր:
Նախագծում նշվում է, որ 2008թ. Մարտի 1-ը դարձավ նախորդ նախագահական ընտրություններից հետո պետական ահաբեկչական դրսեւորումների (այդ թվում 2004թ.) գագաթնակետը: «2008 թվականի մարտի 1-ին Երեւանում խաղաղ ցուցարարների նկատամամբ կիրառվեց բանակն ու ոստիկանության զորքերի տորաբաժանումները. արդյունքում առնվազն 10 մարդ սպանվեց՝ այդ թվում երկու զինծառայող, հարյուրավոր քաղաքացիներ ստացան հրազենային, բեկորային եւ այլ մարմնական վնասվածքներ։ Մինչեւ օրս չեն բացահայտվել եւ պատասխանատվության չեն կանչվել այդ սպանությունները կատարած անձինք: Պատասխանատվության չեն կանչվել նաեւ տասնյակ հարյուրավոր քաղաքացիներին մարմնական վնաս պատճառած անձիք»,- մասնավորապես նշվում է 4 պատգամավորների հեղինակած նախագծում: