Ռուսաստանը մտավ խաղի մեջ
ՔԱՂԱՔԱԿԱՆՈՒԹՅՈՒՆՕրերս Վլադիմիր Պուտինն առաջին անգամ հրապարակավ անդրադարձավ Ադրբեջանի կողմից Արցախի դեմ սանձազերծված պատերազմին և հայտարարեց, որ դա ողբերգություն է Ռուսաստանի բարեկամ երկու ժողովուրդների համար էլ, և կրակը պետք է արագ դադարեցվի: Պուտինը հայտարարել է նաև, որ անընդհատ շփման մեջ է եղել Նիկոլ Փաշինյանի հետ, և որ Հայաստանի ղեկավարությունը հարցեր չունի ՌԴ դաշնակցային պարտավորությունների կատարման որակի հետ կապված: Ըստ էության՝ Պուտինը, առաջին անգամ անդրադառնալով իրադրությանը, արել է էական հայտարարություններ, որոնք պարունակում են բավականին ուշագրավ ազդակներ:
Ոչ պակաս էական է նաև այն, որ ՌԴ նախագահը արդեն երկշաբաթյա պատերազմին հրապարակային անդրադարձ է կատարում այն բանից հետո, երբ առաջինը խոսել է Իլհամ Ալիևի հետ: Ալիևին այդ զանգը պարտադրել է հայկական բանակը, որը տապալել է թուրք-իսրայելական պատերազմական պլանները և, ըստ էության, սրել Ալիևի՝ ընդհուպ ֆիզիկական անվտանգության հարցը: Ի՞նչ են խոսել Ալիևն ու Պուտինը, հանգամանալից հայտնի չէ, սակայն հատկանշական է, որ դրանից հետո փաստորեն ՌԴ նախագահը հրապարակավ անդրադառնում է իրավիճակին առաջին անգամ, արդեն սեփական դեմքով հայտարարելով կրակի արագ դադարեցման անհրաժեշտության մասին:
Հայտարարության հետագա զարգացումները երկար սպասեցնել չտվեցին, քանի որ Պուտինի հայտարարությունից երկու օր անց այսօր Մոսկվայում հանդիպում են ՀՀ և Ադրբեջանի ԱԳ նախարարները, որպեսզի քննարկեն առաջիկա անելիքների մասին։ Միևնույն ժամանակ, հատկանշական է՝ Պուտինի պատասխանատվություն ստանձնելու քայլից առաջ մի քանի քայլ, որ եղավ Ռուսաստանում: Նախ՝ հոկտեմբերի 5-ին ՌԴ նախագահը կատարեց էական նշանակում Ադրբեջանին սահմանակից Դաղստանի ղեկավարի պաշտոնում՝ գեներալ Սերգեյ Մելիքով, հակաահաբեկչական պայքարի փորձով, ազգությամբ՝ լեզգին: Դա, թերևս, բավականին ուժեղ և կոշտ ազդակ էր Բաքվին: Հաջորդիվ, մինչ այդ ԱԳՆ կամ Կրեմլի խոսնակի մակարդակով մտահոգություն բարձրաձայնող ՌԴ-ն արդեն արտաքին հետախուզության ծառայության ղեկավարի մակարդակով հայտարարեց ռեգիոն ահաբեկիչների ներգրավման մասին, որն, իհարկե, իր ձևակերպումներում բազմիմաստ և հարցեր առաջացնող հայտարարություն էր, սակայն, թերևս, Անկարայի համար հասկանալի հաղորդագրություններով:
Դրան էլ զուգորդեց ՌԴ ուժային կառույցներին մոտ կանգնած «Տելեգրամ» ալիքներից մեկով տեղեկությունը, որ ՌԴ օդատիեզերական ուժերը հարված են պատրաստում Սիրիայի Իդլիբում ահաբեկչական խմբավորումների պատրաստման ճամբարներին: Ակնհայտ է, որ Արցախում տեղի ունեցող պատերազմի կանխման և արյունահեղությունը կասեցնելու հարցում առանցքային դերակատարությունը Ռուսաստանի ձեռքին է։
Անդրանիկ Կիրակոսյան