Թուրքական հեռուստաընկերությունը աշխատանքից հեռացրել է խմբագրի «ճշմարիտ» խորագրի պատճառով
ՄԻՋԱԶԳԱՅԻՆrossaprimavera.ru-ն գրում է, որ «Ադրբեջանը հարձակվում է քաղաքացիական անձանց վրա» սկանդալային վերնագիրը դարձել է թուրքական պետական TRT հեռուստառադիոընկերությունից լրատվական խմբագիր Մեհմեդ Քարաջին աշխատանքից հեռացնելու պատճառ: Այս մասին նոյեմբերի 5-ին հայտնել է թուրքական Ulusal Turk լրատվական կայքը: Ադրբեջանից ուղիղ հեռարձակման ժամանակ հեռուստաընկերության թղթակիցը կրակի տակ գտնվող ադրբեջանական գյուղերի ֆոնին ասել է, որ «Հայաստանը արգելված զենքով հարձակվում է խաղաղ բնակիչների վրա»: Միևնույն ժամանակ, ամբողջ ռեպորտաժի ընթացքում, էկրանի ներքևում եղել է վերնագիր. «Ադրբեջանը հարձակվում է խաղաղ բնակիչների վրա»: Այս վերնագրի համար աշխատանքից հեռացվել է լուրերի խմբագիր Մեհմեդ Քարաջան:
Նշենք, որ ռեպորտաժից անմիջապես հետո հայկական սոցիալական ցանցերում հաղորդագրություններ են տարածվել այն մասին, որ «Թուրքիան վերջապես ասաց ճշմարտությունը»: Ադրբեջանն ու Թուրքիան այս վերնագիրն ամոթ են որակել:
Ադրբեջանի նախագահի օգնական Հիքմեթ Հաջիևը ադրբեջանական լրատվամիջոցներին տված մեկնաբանության մեջ նշել է, որ TRT- ի վերնագիրը եղել է «հայկական սադրանք»:
Մեհմեդ Քարաջին տեղադրված սկանդալային խորագրի համար ներողություն է խնդրել Twitter-ի իր էջում, որը շուտով փակել է: Բայց չնայած խմբագրի ներողությանը, սկանդալային վերնագիրը շարունակվել է տարածվել ադրբեջանական և թուրքական լրատվամիջոցներում և սոցիալական ցանցերում: Այս կապակցությամբ հեռուստաալիքը որոշել է աշխատանքից հեռացնել խմբագրին: Լրատվական խմբագրին աշխատանքից հեռացնելու TRT-ի որոշումը պաշտպանել են թուրք ծայրահեղ աջ ազգայնականները: Մեհմեդ Քարաջիի Twitter-ի էջը դեռ փակ է, և նա արդեն հեռացրել է «աշխատել եմ TRT-ում» տողը իր կենսագրությունից:
Նյութը հրապարակման պատրաստեց Կամո Խաչիկյանը