ԱՄՆ-ն դուրս է գալիս Բաց երկնքի համաձայնագրից
ՄԻՋԱԶԳԱՅԻՆԱՄՆ-ն նոյեմբերի 22-ից դադարում է Բաց երկնքի համաձայնագրի մասնակից լինելուց: Այսօր լրանում է 6 ամիսը այն օրից, երբ ԱՄՆ-ն համաձայնագրի դեպոզիտորներ Կանադային և Հունգարիային, ինչպես նաև համաձայնագրի մասնակից մյուս երկրներին համաձայնագրից դուրս գալու մասին փաստաթուղթ է ուղարկել:
ԱՄՆ–ն նշել է, որ պայմանագրից դուրս գալու պատճառը Ռուսաստանի կողմից համաձայնագրի կետերի չկատարելն է, գրում է ՏԱՍՍ գործակալությունը:
Այսպիսով, ԱՄՆ-ն այլևս չի կարողանա համաձայնագրի մասնակից երկրների ցանկացած տարածքում ռազմական գործունեության ուսումնասիրման նպատակով թռիչքներ կատարել, ինչպես նաև հասանելիություն չի ունենա թռիչքների ժամանակ ձեռք բերված տվյալներին:
Վերջին վեց ամիսների ընթացքում ամերիկյան կողմը չի հայտարարել Ռուսաստանի հետ որևէ պայմանավորվածության հասնելու մասին: Պետդեպարտամենտը անպատասխան է թողել այս հարցի վերաբերյալ մեկնաբանություն տալու մասին ՏԱՍՍ-ի թղթակցի խնդրանքը: Իր հերթին, Մոսկվան բազմիցս շեշտել է որոշումը չեղյալ հայտարարելու համար Վաշինգտոնի կողմից առաջադրված պայմանների անընդունելիությունը`դրանք որակելով որպես ուլտիմատում: