Նիկոլ Փաշինյանի հիմնական զբաղմունքը իր բոլոր քայլերի համար մեղքը ուրիշների վրա բարդելն է
ՔԱՂԱՔԱԿԱՆՈՒԹՅՈՒՆԱԺ-ում Նիկոլ Փաշինյանը նախօրեին հայտարարել է, որ 2018-ին Լևոն Տեր-Պետրոսյանն իրեն ասել է, որ հողերը պետք է հանձնեն։ Վարչապետը խոսել է նաև Սյունիքիում ռուսական 102 ռազմաբազա տեղակայելու մասին։ Այս թեմայով 1or.am կայքի զրուցակիցը քաղաքագետ Արմեն Բաղդասարյանն է։
— Պարոն Բաղդասարյան, այս հայտարարությամբ արդյոք ընտրություններից առաջ Փաշինյանը փորձում էր արդարացնել իրեն և կրկին վաստակել ժողովրդի վստահությունը։
— Բնականաբար, հիմա Նիկոլ Փաշինյանի հիմնական զբաղմունքը իր բոլոր քայլերի համար մեղքը ուրիշների վրա բարդելն է և այդ ելույթը և դրանից հետո արված իր բոլոր ելույթները խոսում է այն մասին, որ ինքը փորձում է ցույց տալ, որ ոչ մի բանի հետ կապված չի, որ ինքը մեղավոր չի և մեղավոր են բոլորը բացի իրենից։ Իր բոլոր հայտարարությունները այդ համատեքստում են։
— Փաշինյանը նաև խոսել է Սյունիքում ռուսական 102-րդ ռազմաբազայի հենակետ տեղակայելու բանակցությունների մասին։ Ինչպե՞ս եք դա գնահատում այս հայտարարությունը։
— Այո, հիմա դրա անհրաժեշտությունը կա, բայց կարծում եմ, որ դա որևէ կերպ չպետք է վերացնի մեր բանակը զարգացնելու և վերազինելու հարցը։ Այսինքն, դրանք իրարից շատ տարբեր հարցեր են և պետք չի մտածել, որ այստեղ 102-րդ ռազմաբազան հենակետ կունենա և պետք չի մեր բանակը զարգացնել։ Դրանք մեկը մյուսին պետք է լրացնեն։ Մենք մեր անվտանգությունը 100 տոկոսով չենք կարող վստահել բացառապես ռուսներին և մենք ենք նաև պատասխանատու։ Մենք ունենք մեր բանակը վերազինելու, հզորացնելու խնդիր անկախ, նրանից թե ռուսական ռազմաբազան կստեղծվի ,թե ոչ։
—Թուրք-ադրբեջանական տանդեմի կողմից Հայաստանի տարածքների վերաբերյալ հայտարարություններ են հնչում, բացի այդ նաև Բաքվում հակահայկական «պուրակ» է բացվել, որտեղ նաև զոհված հայ զինծառայողների հիշատակն է անարգվում։ Ձեր կարծիքով քաղաքակիրթ աշխարհն այսօր համարժե՞ք է արձագանքում այս իրադարձություններին։
— Ոչ, ես կարծում եմ, որ միջազգային հանրության արձագանքը պետք է լինի շատ ավելի կոշտ, որովհետև դա պարզապես ինչ-որ թանգարան չի և նրանց հայտարարությունները հենց այնպես արվող հայտարարություններ չեն և ես վստահեմ, որ իր այդ գործողություններով Ադրբեջանը նոր պատերազմի է նախապատրաստվում և հիմա դրա քարոզչությունն է տարվում` ամբողջ աշխարհի առաջ փորձելով նախապես արդարեցնել իր այդ պատերազմը։ Եվ իհարկե, Ալիևի երկրորդ նպատակն է դրանով կոծկել պատերազմական այն հանցագործությունները, որ նա իրականացրել է այդ 44 օրվա ընթացքում։ Կարծում եմ, որ մեր արտաքին քաղաքականության հիմնական խնդիրներից մեկն էլ պետք է լինի նախ ապահովել աշխարհի արձագանքը այդ բացահայտ ֆաշիստական դրսևորումներին և երկրորդ՝ այնուամենայնիվ բացահայտել 44 օրյա պատերազմում ադրբեջանական կողմի իրականացրած պատերազմական հանցագործությունները և հասնել նրան, որ գոնե հայտարարությունների մակարդակում դրանք դատապարտվեն։
—Բարձրագույն դատական խորհրդի նախագահը կասկածյալ է քրեական գործով: Երեկ շատ արագ ԲԴԽ-ն նիստ գումարեց և որոշեց կասեցնել ԲԴԽ նախագահ Ռուբեն Վարդազարյանի լիազորությունները: Հանրության մի հատվածի մոտ հիմքեր կան կարծելու, որ Վարդազարյանի նկատմամբ հետապնդումն իրականացվում է նոյեմբերի 15-ի իր հայտնի հայտարարության համար: Դուք այդ գործընթացի մեջ հետապնդման տարրեր տեսնո՞ւմ եք:
— Չեմ կարող ասել քաղաքական հետապնդում կա թե ոչ, որովհետև դա իրավական հարթության վրա է։ Բայց կարող եմ ասել, որ գործող իշխանությունները փորձում են, չակերտավոր ասած, իրենցով անել բոլոր ոլորտները` այդ թվում նաև ԲԴԽ-ն և դա կարող է անել տարատեսակ ճնշումների միջոցով, քրեական գործեր հարուցելու միջոցով։ Այս իշխանությունները ցանկանում են ունենալ հլու հնազանդ իրավական համակարգ և իրենց խոսքերով ասած վնգստացող դատավորներ, որոնք կկատարեն իրենց պատվերը։ Ես կարծում եմ, որ օրվա իշխանությունները, այո, իրենց առջև այդպիսի նպատակ են դրել։
Սոնա Գիշյան