Մենք չենք կարող խոսել անվտանգության հարցերից, եթե մեր բանակը չվերականգնվի. Քոչարյան
ՔԱՂԱՔԱԿԱՆՈՒԹՅՈՒՆ«Այս պահին մեր լրջագույն պրոբլեմը մեր դիմակայելու ռեսուրսների գրեթե իսպառ բացակայությունն է: Մենք չենք կարող խոսել անվտանգության հարցերից, եթե մեր բանակը չվերականգնվի: Բանակցային գործընթացում մենք չպետք է լինենք նվազող կարգավիճակում: Իսկ եթե այդպիսի կարգավիճակում չլինենք, մեր բանակցային դիրքերը բոլորովին այլ կլինեն: Այս վիճակում այս իշխանությունը ոչինչ չի կարող անել: Այս ամբողջ քաղաքական թիմը արդեն կոմպլեքսավորված է և շարժվում է միայն սեփական հետույքը փրկելու ուղղությամբ: Ուրեմն պետք է այն փոխել:
Ես իսկապես հավատում եմ, որ Հայաստանը կարող է լինել մեր տարածաշրջանի ամենակազմակերպված երկիրը: Կազմակերպված նշանակում է ունենալ ամենաարդյունավետ կառավարում, արդյունավետ բարեփոխումներ: Կարող է դառնալ մի երկիր, որի հետ քո գործընկերներին հաճելի է գործ ունենալ: Այսօր ոչ ոք չի հասկանում, թե Հայաստանն ինչ է ուզում:
Հիմա դու բերել ես դիրքը քո խորքում դրել, իսկ ինքը առաջ է եկել։ Դու աշխարհով մեկ գոռում ես՝ թող Ղազաստանը, Ղրղզստանը Ադրբեջանին գան հետ տանեն։ Դու ո՞ւր ես։ Մի հատ հասկանանք՝ ինչո՞ւ է այնպես ստացվել, որ ՀԱՊԿ-ի շրջանակներում բոլորն ավելի լավ հարաբերություններ ունեն Ադրբեջանի հետ, որը ՀԱՊԿ-ի անդամ երկիր չէ, քան Հայաստանի հետ։ Այս պարզ հարցի պատասխանը պե՞տք է տալ, թե՞՝ ոչ։ Ինչո՞ւ Բելառուսը, Ղազաստանը, Ղրղզստանը Ադրբեջանի հետ ավելի լավ հարաբերություններ ունենան: Ինչո՞ւ նրանք պետք է քեզ պաշտպանեն, եթե դու քո սահմանին կանգնած չես, քո սահմանը չես պաշտպանում, դիմում ես ՀԱՊԿ-ին և դա որպես հերոսություն մատուցում քո ժողովրդին։ Հետո՞։ Սա ուղղակի զավեշտի է վերածվում: Պետությունն ունի իր մասշտաբը, որպես պետություն: Եթե դու քո հիմնական անվտանգային գործառույթը չես իրականացնում, ո՞վ ես դու ընդհանրապես և ինչո՞ւ քեզ հետ պետք է հաշվի նստեն: Ապտակն ապտակի հետևից ստանալու ես:
Մեր մարդկային կապիտալը հնարավորություն է տալիս էական առավելություն ունենալ այս տարածաշրջանում: Այդ մարդկային կապիտալը պետք է ճիշտ դրսևորումներ ստանա և ճիշտ միջավայրում հայտնվի: Այդ միջավայրի ստեղծողը պետք է կառավարությունը լինի, ազգի էլիտան պետք է կարևոր դերակատարություն ունենա: Եթե չեմ սխալվում, Իսրայելի վարչապետերից մեկը՝ Գոլդ Մեյերը, հետաքրքիր խոսք ունի. «Եթե ուզում ես լավ երկիր կառուցել, լավ վարձատրիր զինվորականին, բժշկին և ուսուցչին»: