Ադրբեջանցիների գործողությունները կլինի Արցախում, Գորիսում, թե Սյունիքում ցեղասպանություն են. Լարիսա Ալավերդյան
ՔԱՂԱՔԱԿԱՆՈՒԹՅՈՒՆԱյն, ինչ որ կոչում են դրվագ, սադրանք կամ վախեցնել և այլ տերմիններով՝ իրականում դրանք հետևողական քայլեր են մեծ քաղաքականություն իրականացնելու համար, այն է՝ ցեղասպանություն: Այս մաին ArmDaily.am-ի հետ զրույցում ասաց նախկին ՄԻՊ Լարիսա Ալավերդյանը՝ անդրադառնալով երեկ Սյունիքի մարզի Որոտանի մոտ տեղակայված ադրբեջանական ոստիկանական կետի մոտ արցախցի երեխաներին տեղափոխող միկրոավտոբուսը կանգնեցնելուն ու դանակով Արցախի էմբլեման ջնջելուն:
«Ես հիշեցնեմ, որ միջազգային այդպիսի կոնվենցիա կա՝ Ցեղապանության կանխարգելման և դրա համար պատժի մասին, և այնտեղ համապատասխան հոդվածում՝ երրորդ ենթակետում ուղղակի գրում են, որ ցեղասպանություն է կոչվում նաև այնպիսի պայմաններ ստեղծելը, որ անհնարին դառնա մի որևէ խմբի համար այստեղ ապրելը: Լինի դա Արցախ, Գորիս, Սյունիքն ընդհանրապես, ես բոլորին խնդրում եմ՝ մի դիտարկեք այդ բոլոր քայլերը հատվածական կամ որպես առանձին դրվագներ, որպես անբարեխիղճ ադրբեջանցիների կամ անմարդկային դրսևորումներ: Դա կառավարվող, դա ուղղորդված, դա արդեն մեկ դարից ավել Ադրբեջանի կողմից և մի քանի դար Թուրքիայի կողմից հետևողական իրականացվող ցեղասպանության քաղաքականություն է»,-ասաց Ալավերդյանը:
Նա շեշտեց, որ Հայատանում կա մի ստվար զանգված, որը կարծում է, թե ցեղասպանությունը դա միայն սպանությունն է, այնինչ հինգ տեսակի գործողություններ կա, որոնք որակվում են որպես ցեղասպանություն: Նա նշում է, որ Ադրբեջանի գործողությունները մեկ գնահատականի կարող են արժանանալ և դա ցեղասպանության թևերից մեկի իրականցումն է:
Լարիսա Ալավերդյանը նկատեց, որ ադրբեջանցիները այս գործողությունները հատուկ ցուցադրական կերպով են անում, քանի որ չեն արժանանում Հայաստանի իշխանությունների պատասխանին նմանօրինակ գործողություններին:
«Ես չեմ պատկանում այն խավին, որը ակնկալիք ունի Հայաստանի Հանրապետության ներկա իշխանություններից: Ինչո՞ւ: Դատելով միայն արդյունքներով, որոնք որ մենք տեսնում ենք միայն նոյեմբերի 9-ից հետո կամ սեպտեմբերի 27-ից հետո անցած տարվա, այլ 2018 թվականից, երբ որ եկել են իշխանության՝ նրանց որևէ մի քայլ չի հակասել թուրք-ադրբեջանական ցեղասպանական քաղաքականությանը: Այսինքն, ես չէ որ պիտի գնահատական տամ՝ դա արվում է գիտակցաբար կամ անգիտակցաբար, բայց իմ համոզմունքը կարող եմ ասել, որ դա ամբողջովին արվում է հստակ ընկալմամբ, թե իրականում ինչ է անում Ադրբեջանը: Երբևիցե ինձ մոտ միտք չի ծագել, արդյոք դա փողով է, կոռուպցիա է կամ գնել են, անգամ եթե դա իրենք անում են անկեղծ՝ ես կարծում եմ, որ դա ավելի մեծ կեղծ է, քան եթե դա լիներ կոռուպցիա»,-ասում է նախկին ՄԻՊ-ը:
Ալավերդյանը նկատում է, որ Հայատասնի Հանրապետության նեկա իշխանության քայլերը կամ անգործությունը, այդ ամեն իրենց մեջ պարունակում են Հայաստանի Հանրապետության քրեական օրենսգրքի 28-րդ գլխի հանցագործությունների ամբողջ հատկանիշները, այն է՝ պետական անվտանգության դեմ և սահմանադրական կարգի դեմ հանցագործություններ:
«Բոլոր այդ ընտրազանգվածի ներկայացուցիչները, որոնք որ համաձայն էին այդպիսի գործողությունների հետ, նրանք հանցակից են»,- ասում է վերջինս:
Նա հարց է բարձրացնում՝ արդյոք իրավունք ունի իշխանությունը, ստանալով պողպատե կամ այլ մանդատ, դա անելու՝ իհարկե ոչ:
«Այդ ընտրազանգվածը իրավունք չունի դա անել՝ իրենք բոլորը պիտի կրեն պատասխանատվություն որովհետև կրկնում եմ, այս գործող Սահմանադրությամբ այս ընտրված իշխանությունները իրավունք չունեն և երբ որ դա նրանք անում են՝ կատարում են գործողություններ, որոնք իրենց մեջ պարունակում են բոլոր ծանրագույն հանցագործությունների հատկանիշներ»,-ասաց Լարիսա Ալավերդյանը: