Այս իշխանությունն իրավունք չունի ներկայացնելու մեր երկիրը. Արտակ Թովմասյան (տեսանյութ)
ՔԱՂԱՔԱԿԱՆՈՒԹՅՈՒՆԱննախադեպ վիճակ է, պետք է հասկանալ մեր գեներալների ղեկավար կազմի դերը, չէ՞ որ վարչապետի հրաժարականի պահանջի տակ ստորագրել է ավելի քան 40 բարձրաստիճան զինվորական, այսինքն՝ նրանք կիսում են դրա պատասխանատվությունը. իշխանությունները չեն կարողանում ապահովել մեր սահմանների պաշտպանությունը, դա դժվարացնում է բանակի պահվածքը, իշխանության այս աժիոտաժը շինծու է: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել «Երրորդ ուժ» քաղաքացիական նախաձեռնության ղեկավար, «Թովմասյան» բարեգործական հիմնադրամի հիմնադիր Արտակ Թովմասյանը:
«Վարչական դատարանի որոշումից են կախված Օնիկ Գասպարյանի շուրջ հետագա զարգացումները: Դատավորները, քաղաքական շրջանակները ենթարկվում են ճնշումների, շանտաժի, մանիպուլյացիաների: Ժողովրդավարությունն այսպես չի իրականացվում: Հասարակությունը պետք է իր քայլերը ձեռնարկի, վերջին երեք տարում տեսնում ենք միայն սուտ և պոպուլիստական հայտարարություններ, ոչ թե կոնկրետ քայլեր, որոնք խոսք էին տրվել»,- ասել է քաղաքական գործիչը:
Ըստ Թովմասյանի՝ պետք է կենտրոնանալ խորհրդարանի վրա և պատգամավորներին ներքաշել քաղաքական երկխոսության դաշտ. «Պատգամավորները պետք է գիտակցեն իրենց պատասխանատվությունը, նրանք են իշխանության նշանակողը, նրանք էլ կարող են ազատել: Մենք խորհրդարանական պետություն ենք, բայց մտածում ենք նախագահական մոտեցմամբ: Կան շատ մարդիկ և՛ այստեղ, և՛ Սփյուռքում, որոնց համար սա աթոռի կռիվ չէ: Իշխանության փոփոխության համար պետք է ճնշում գործադրվի: Մեր պատգամավորները, հասկանալով ստեղծված իրավիճակը, կարող են վարչապետի նոր թեկնածու առաջադրել»:
Քաղաքական գործչի կարծիքով՝ մարդկանց դժգոհությունը քաղաքականապես չի ձևակերպվում, դրանով է պայմանավորված շատերի պասիվությունը. «Մոտեցումները պետք է լինեն Սահմանադրության շրջանակում, այդպես հնարավոր կլինի խուսափել ցնցումներից: Այսօր պետք է հարցեր ուղղել ԱԱԾ-ին և Գլխավոր դատախազությանը: Գլխավոր շտաբն իր բոլոր գեներալներով պահանջում է վարչապետի հրաժարականը, այսինքն՝ դրա համար ինչ-որ հիմք ունեն: Իսկ ի՞նչ է անում ԱԱԾ-ն: Մենք ունեցել ենք պատերազմ և խայտառակ պարտություն, որի համար իշխանությունը մեղադրում է բանակին, բանակն էլ՝ իշխանությանը: Ժամանակը ցույց տվեց, որ վարչապետն ամենաշատն իրեն է սիրում, ոչ թե ազգին: Նա բացեիբաց ասում է, որ հնարավորություն ուներ կանգնեցնելու պատերազմը, բայց դա չի արել»:
Քաղաքական գործչի պնդմամբ՝ այս իշխանությունը չունի ո՛չ ձիրք, ո՛չ մոտեցում, հետևաբար՝ իրավունք չունի ներկայացնելու մեր երկիրը, քանի որ չի արձագանքում Ալիևի՝ մեր արժանապատվությունը նվաստացնող հայտարարություններին: «Այս իշխանությունն անգամ չի հրապարակել գերիների, անհետ կորածների և զոհերի ստույգ թիվը: Պատերազմի սկսվելու պատճառն է պետք հասկանալ, միգուցե դա «Արցախը Հայաստան է և վերջ» հայտարարությո՞ւնն էր: Դա ստիպում է մտածել, որ մեր իշխանության կողմից եղել է դավաճանություն կամ դավադրություն»,- ամփոփել է Արտակ Թովմասյանը: