«Քրեյզի» ակումբի պարուհու վրա օղի լցրած Դավիթ Պողոսյանի դատավարությունը տեղի կունենա վաղը
ԻՐԱՎՈՒՆՔ
Կենտրոն Նորք Մարաշ վարչական շրջանների ընդհանուր իրավասության դատարանում վաղը՝ դեկտեմբերի 16-ին. նշանակված է «Քրեյզի» գիշերային ակումբի ծեծկռտուքի հայտնի գործով դատավարությունը:
Մեղադրյալը Դավիթ Պողոսյանն է, ով, ըստ մեղադրանքի, 2015թ. ապրիլի 21-ին ժամը 03:00-ի սահմաններում, գտնվելով Երևանում գործող «Քրեյզի» գիշերային ակումբում և լինելով ալկոհոլային հարբածության վիճակում, դիտավորությամբ կոպիտ կերպով խախտելով հասարակական կարգը և, արտահայտելով բացահայտ անհարգալից վերաբերմունք ակումբում գտնվողների նկատմամբ, աղմկել և անհասցե սեռական բնույթի հայհոյանքներ է հնչեցրել, իսկ ձեռքին եղած շշով օղին լցրել է ակումբի պարուհի Մարիաննա Մնացականյանի վրա:
Այնուհետև ժամը 03:15-ի սահմաններում, նույն ակումբի նախասրահում առողջության համար ոչ վտանգավոր բռնություն է գործադրել իշխանության ներկայացուցիչ հանդիսացող` ՀՀ ոստիկանության ՊՊԾ գնդի 3-րդ հատուկ գումարտակի 1-ին վաշտի 1-ին դասակի ոստիկան ոստիկանության ավագ սերժանտ Գոռ Տերզիկյանի նկատմամբ։
Իրեղեն ապացույցներ են`գիշերային ակումբի տեսաձայնագրությունն ու ոստիկանի համազգեստը:
