Հայաստանի ԱԳՆ-ն՝ սեփական ձևակերպումների գերի

Հայաստանի արտգործնախարար Արարատ Միրզոյանը նախօրեին երկու հանդիպում է ունեցել և երկու դեպքում էլ ԵԱՀԿ Մինսկի մասին խոսելիս թույլ է տվել բացառապես իրար հակասող ձևակերպումներ։

ՄԱԿ-ի գլխավոր ասամբլեայի 76-րդ նստաշրջանի նախագահ Աբդուլա Շահիդի հետ հանդիպման վերաբերյալ հաղորդագրության մեջ նշվում է, թե նախարար Միրզոյանը վերահաստատել է Լեռնային Ղարաբաղի հակամարտության խաղաղ կարգավորմանը հասնելու Հայաստանի հանձնառությունը ԵԱՀԿ Մինսկի խմբի համանախագահության հովանու ներքո՝ նշելով, որ այն միջազգային մանդատ ունեցող միակ ձևաչափն է, որի շրջանակներում կարող են հասցեագրվել Լեռնային Ղարաբաղի ժողովրդի անվտանգության և բոլոր իրավունքների պաշտպանության հարցը։

Նույն օրը Միրզոյանն ընդունել է նաև Ռուսաստանի արտաքին գործերի նախարարի հատուկ ներկայացուցիչ Իգոր Խովաևին և պաշտոնական հաղորդագրության մեջ այսպիսի ձևակերպում է սպրդել.

«Նախարար Միրզոյանի կողմից ընդգծվել է ԵԱՀԿ Մինսկի խմբի համանախագահության ինստիտուտի և փորձի օգտագործման կարևորությունը՝ իր միջազգային մանդատին համապատասխան»։

Թերևս հարկ է նշել, որ եթե Շահիդի հետ հանդիպմանը նշել են, թե ԵԱՀԿ Մինսկի խմբի հովանու ներքո պիտի իրականացվի կարգավորումը, և դա միջազգային մանդատ ունեցող միակ ձևաչափն է, ապա Ռուսաստանի ներկայացուցչի հետ հանդիպմանը նշում է, թե պետք է օգտագործել Մինսկի խմբի համանախագահության ինստիտուտի փորձի օգտագործման կարևորությունը։

Մեկ այլ դրվագով Միրզոյանը պաշտոնական հաղորդագրության մեջ Իգոր Խովաևին ներկայացրել է ԵԱՀԿ Մինսկի խմբի ռուսաստանցի համանախագահ։ Մինչդեռ Խոաևն այդպիսի կարգավիճակ չունի, Ռուսաստանը վաղուց այլևս հայտարարել է, թե ԱՄՆ-ն և Ֆրանսիան չեն համագործակցում իր հետ ԵԱՀԿ Մինսկի խմբում, նաև վաղուց այլևս ձեռք են քաշել ԵԱՀԿ Մինսկի խմբից, իսկ Իգոր Խովաևին ի տարբերություն իր նախորդ գործընկերների, ԵԱՀԿ Մինսկի խմբի ռուսաստանցի համանախագահ չեն նշանակել։

Այս ամենը ընդամենը վկայում է, որ Հայաստանի արտգործնախարարությունը սեփական հանրության հետ հարաբերվում է իր քարոզչական թեզերով, վախենում կոնկրետ դեպքերում արձանագրել սեփական սկզբունքներն ու դիրքորոշումները և տուրք է տալիս բացարձակ պատեհապաշտությանն ու պոպուլիզմին։

Գարիկ Կարապետյան