Պապիկյանը հիշել է, որ պաշտպանության նախարար է
ՎԵՐԼՈՒԾՈՒԹՅՈՒՆՆԵՐ
Պաշտպանության նախարար Սուրեն Պապիկյանի վերջին օրերի ակտիվությունը, ըստ էության, վկայում է մեկ բանի մասին։ Նշենք, որ պաշտպանության նախարարությունը՝ ԳՇ պետ Էդուարդ Ասրյանի հրամանով, լայնածավալ ստուգումներ է իրականացնում բոլոր զորամասերում։
Սովորաբար այդ ստուգումներին մասնակցում են միայն ԳՇ սպաները, մարտական և այլ վարչությունների ղեկավարները, երբեմն էլ նաև Գլխավոր շտաբի պետը։ Պաշտպանության նախարարը սովորաբար հազվադեպ է մասնակցում, բայց վերջին երեք օրվա ընթացքում Պապիկյանը հասցրել է արդեն 4 զորամաս այցելել և բոլոր տեղերից լուսանկարներ ու տեսանյութեր տարածել։
Տպավորություն է, թե ի վերջո տևական ժամանակ «Քաղպայմանագրի» տարածքային կառույցներով զբաղվող պաշտպանության նախարարը վերհիշել է, թե ինչ պաշտոն է ի վերջո զբաղեցնում և անցել է իր պարտականությունների անմիջական կատարմանը։
ՔՊ մեր աղբյուրի պնդմամբ՝ այս ամենը բացառապես քարոզչական նպատակ ունի, ՔՊ համաժողովի կեղծումից և իր դիրքերի թուլացումից հետո Պապիկյանն այժմ փորձում է նախ Նիկոլ Փաշինյանին համոզել, որ հենց ինքն է պաշտպանության նախարարի միակ և անկրկնելի թեկնածուն, նաև կուսակիցներին ներկայացնել, թե իբր իր դիրքերը բոլորովին էլ խարխլված չեն կուսակցությունում։
Իհարկե քարոզչական այս հնարքները լրագրողական և խմբագրական բազմամյա փորձ ունեցող Փաշինյանի մոտ կարող են միայն քմծիծաղ առաջացնել, եթե նա որոշել է հեռացնել Պապիկյանին, ապա կհեռացնի անկախ նրանից, թե Պապիկյանն ինչ ծամածռություններ է անում տեսախցիկի առջև՝ հոտոտելով զինվորական ճաշարանների խնձորը։
Պաշտպանության նախարարությունից էլ նկատում են, թե իրենց համար անակնկալ է եղել պաշտպանության նախարարի այս հանկարծահաս ակտիվացումը։ Նախարարին, որ ամիսներ շարունակ չէին կարողանում գտնել նախարարության շենքում, այժմ կարելի է հանդիպել տարբեր զորամասերում՝ օրական մի քանի տարբեր վայրերում։
«Սորոսի հիմնադրամը» ձեռ է քաշում հայաստանյան գրասենյակից: Երեկ հայաստանյան հասարակական դաշտում մի իրադարձություն է տեղի ունեցել, որն այնքան էլ մեծ ուշադրության չի արժանացել հանրության կողմից։ Զբաղված լինելով Հանրապետության հարապարակի պատի մեջ մեխ դնել-չդենելու հարցերով՝ հայ հանրությունը պատշաճ կերպով չի արձագանքել «Սորոսի հիմնադրամի» տեղական կառույցի հայտարարությանը։
«Բաց հասարակություններ հիմնադրամ-Հայաստանը» հայտարարել է, թե առաջիկայում իր աշխատանքն առաջ է տանելու որպես լիովին անկախ հիմնադրամ, որն առանձնանում է կազմակերպության գլոբալ ցանցից։ «Սորոսի հիմնադրամ» անվանումով հայտնի «Բաց հասարակության հիմնադրամներ» կազմակերպությունը մինչև 2025 թվականն է ֆինանսավորելու տեղական կառույցին, իսկ 2023 թվականից լիովին նոր անկախ տեղական կառույց է ստեղծվելու, որի գործունեության ուղղությունների և ռազմավարության մասին կտեղեկացվի լրացուցիչ։
Հատկապես 2018 թվականի իշխանափոխությունից հետո կոնկրետ այս հիմնադրամի գործունեությունը լուրջ տարակուսանք և կասկածներ է առաջացրել հայ հանրության շրջանում։ Ըստ էության, այս հիմնադրամի բազմաթիվ ներկայացուցիչներ հակահայկական դավադիր գործունեություն են ծավալել և ծավալում գործող իշխանության կազմում՝ արժանանալով հանրության կշտամբանքին և պարսավանքին։ Առայժմ հայտնի չէ, թե որն է պատճառը, որ կազմակերպության գլոբալ ցանցը հրաժարվում է իր տեղական մասնաճյուղից, քաղաքական են այդ պատճառները, թե այլ առավել խորքային խնդիրներ կան տեղական կառույցի հետ, սակայն փաստն այն է, որ Սորոսի հիմնադրամը առնվազն 3 տարվա ընթացքում հրաժարվելու է տեղական «ռոզլիվի» սորոսականներից։
Հայտնի չէ նաև, թե ինչ նոր անունով է հանդես գալու տվյալ հիմնադրամը։ Ինչ անունով էլ, որ լինի, կամ էլ պահպանի իր նախկին անվանումը, ըստ էության, «Սորոսի հիմնադրամը», հիմնադրումից հետո մինչ օրս բազմաթիվ լուրջ խնդիրներ է հարուցել թե՛ Հայաստանի և թե՛ Արցախի համար։
Աննա Նադոյան
