Հրազդան գետում մաքրող-լվացող նյութերի մեծ քանակություն է եղել. նախարար
ՀԱՍԱՐԱԿՈՒԹՅՈՒՆԲնապահպանության նախարարությունը Հրազդան գետը փրփուրով պատվելու վերաբերյալ երկու ահազանգ է ստացել՝ ապրիլի 28-ին և մայիսի 6-ին։
Այսօր լրագրողների հետ հանդիպման ժամանակ բնապահպանության նախարար Արծվիկ Մինասյանը տեղեկացրեց, որ առաջին ահազանգից հետո փորձանմուշ են վերցրել, փորձաքննություն է իրականացվել և արդեն նախնական արդյունքը կա։
«Մաքրող-լվացող նյութերի մեծ քանակություն է եղել գետում։ Մենք ձեռնարկելու ենք այցելություններ գետի երկայնքով գտնվող բոլոր հաստատությունները, որպեսզի պարզենք, թե որտեղից է այն լցվել և լրացուցիչ պահանջներ կիրառենք։ Երկրորդ ահազանգը մենք ստացել ենք մայիսի 6-ին, այս անգամ էլ վերցված նմուշն ուղարկվել է փորձաքննության»,-ասաց նախարարը։
Արծվիկ Մինասյանը խոսեց հարցի հիմնարար մոտեցման մասին. «Ցավոք այսօր մենք մեր երկրում դեռևս չենք ձևավորել ջրահեռացման և կոյուղաջրերի մաքրման արդյունավետ մի համակարգ, ինչը ենթադրում է թե ջրառի, թե ջրահեռացման ժամանակ պահպանել էկոլոգիական բոլոր պայմանները։ Ջրային օրենսգրքում համապատասխան փոփոխությունների նախաձեռնությունն արդեն իրականացրել ենք, որպեսզի նմանատիպ երևույթների համար սահմանենք թե պահանջներ ջրօգտագործողների համար, թե անկախ մոնիթորիգային համակարգ»։