Ցեղասպանության մեջ մեղադրվող Կարաջիչը դատապարտվեց 40 տարվա ազատազրկման
ՄԻՋԱԶԳԱՅԻՆՆախկին Հարավսլավիայի հարցերով միջազգային տրիբունալը բոսնիացի սերբերի նախկին առաջնորդ Ռադվան Կարաջիչին 40 տարվա ազատազրկման է դատապարտել` 1992-95 թվականների Բոսնիական պատերազմի ժամանակ իրականացված ցեղասպանության եւ ռազմական հանցագործությունների համար:
Մասնավորապես, ինչպես հայտնում է BBC-ն, դատարանը Կարաջիչին մեղավոր է ճանաչել 1995 թվականին Սրեբրենիցայում մահմեդականների զանգվածային սպանության մեջ: Այդ ջարդերի զոհ էր դարձել ավելի քան յոթ հազար տղամարդ:
Կարաջիչը նաեւ մեղավոր է ճանաչվել Սարաեւո քաղաքի պաշարման ժամանակ խաղաղ բնակիչների վրա իրականացված հարձակումների եւ սպանությունների մեջ:
Միեւնույն ժամանակ, սակայն, դատարանը Կարաջիչին արդարացրել է ցեղասպանության վերաբերյալ առաջադրված երկու մեղադրանքներից մեկով: Ընդհանուր առմամբ` առաջադրված 11 մեղադրանքներից Կարաջիչը մեղավոր է ճանաչվել 10-ում:
Բոսնիական պատերազմի ավարտից հետո Կարաջիչը թաքնվում էր եւ ձերբակալվել է միայն 2008 թվականին եւ հանձնվել Հաագայի դատարանին: Ինքը` Կարաջիչը, պնդում է, որ բոսնիացի սերբերը գործել են ինքնապաշտպանության շրջանակներում, իսկ անձամբ նա Սրեբնիցայում սպանություններ իրականացնելու ոչ մի հրաման չի տվել: Կարաջիչի պաշտպանությունը պատրաստվում է բողոքարկել դատարանի վճիռը: