Նույնիսկ Արցախը մենակ ազատագրած «Ռեմբոն» իրավունք չունի հանցագործություն կատարել ու մնալ անպատիժ․ ԵԿՄ
ՊԱՏՄՈՒԹՅԱՆ ԱՅՍ ՕՐԸԵրկրապահ կամավորականների միությունը (ԵԿՄ) որեւէ կերպ չարձագանքեց հուլիսի 17-ին «Սասնա ծռեր» խմբի կողմից ՊՊԾ գնդի գրավմանը եւ դրան հաջորդած զարգացումներին։ Պատճառը, ըստ ԵԿՄ մամուլի խոսնակ Վարդան Վարդանյանի, հետեւյալն էր՝ ԵԿՄ-ն չցանկացավ միջամտել եւ կամ խոչընդոտել իրավապահների գործունեությանը։ Հիշյալ կառույցը, ըստ Վարդանյանի, չի առաջնորդվում «դատարկ կոչեր անելու» գործելակերպով, քանի որ ԵԿՄ-ի ցանկացած կոչին ավանդաբար հետեւել է կոնկրետ գործղություն կամ միջոցառում։ «Ֆեդերիկա Մագերինիից` սկսած բոլորը կոչ էին անում զենքերը վայր դնել։ Սակայն այդ կոչերին ի պատասխան քայլեր չձեռնարկվեցին ՊՊԾ գունդը գրաված մարդկանց կողմից»,-նկատեց ԵԿՄ մամուլի խոսնակը։
«ԵԿՄ-ն ունի իր առաքելությունը, իր անելիքները, ինչը հետեւողականորեն ու անշեղորեն իրականացնում է։ Ապրիլյան օրերին, երբ եղավ ադրբեջանական ագրեսիան, առաջինը արձագանքեց ԵԿՄ-ն եւ հայտարարություն տարածեց ու կոչ արեց, որին հաջորդեց կոնկրետ քայլ։ ԵԿՄ վարչության նախագահ Մանվել Գրիգորյանը 5 հազար կամավորականով հայտնվեց առաջնագծում, կարողացան ջոկերում, վաշտերում գրանցվել եւ փաստացի հասնել նրան, որ Ադրբեջանը ստիպված լինի գնալ կրակի դադարեցման։ ԵԿՄ-ի կարեւորագույն խնդիրներից մեկը հետեւյալն է՝ լինել սահմանապահ ժողովրդի եւ զինվորի, բանակի կողքին»,-մեկնաբանեց Վարդանյանը։
Ինչ վերաբերում է ՊՊԾ գնդի գրավմանը, ապա, ըստ Վարդանյանի, ԵԿՄ-ի լռությունն այս առթիվ օբյեկտիվ է։ «Տեղի է ունեցել հանցագործություն՝ զինված խմբի կողմից հարձակում է իրականացվել եւ գրավվել է ոստիկանական զորամասը։ Երկրում կան համապատասխան կառույցներ՝ ոստիկանություն, ԱԱԾ, որոնց սրբազան պարտքն է զբաղվել դրանով։ Իսկ մենք արել ենք այն, ինչ պիտի անեինք՝ չենք խանգարել իրավապահներին։ Նրանց գործում քիթ խոթելը, չեմ կածում, թե տեղին էր։ ԵԿՄ-ն իր առաքելությունից չշեղվելով աշխատել է, իսկ կոնկրետ այս դեպքում չի խանգարել իրավապահներին՝ իր ավելորդ կոչերով ու հայտարարություններով»,-հայտարարեց Վարդանյանը։ Նա, որպես ՀՀ քաղաքացի եւ որպես լրագրող, խիստ դատապարտեց ոստիկանների կողմից հուլիսի 29-ին իրականացրած գործողությունները։
«Ակնհայտ էր, որ խոչընդոտեցին լրագրողների աշխատանքը, ուժ կիրառեցին նրանց նկատմամբ, ինչը համապատասխան իրավական գնահատականի պետք է արժանանա»։ Մեր ճշտմանը՝ ԵԿՄ-ն ետայսու ինչ պետք է անի, երբ արդեն հանձնվել են ՊՊԾ գնդի գրավման մասնակիցները, որոնց մեջ կան նաեւ ազատամատիկներ, Վարդանյանը արձագանքեց․«Եթե նույնիսկ լինի ամենամեծ վաստակ ունեցած մարդը, էն մարդը, ով Ռեմբո է եւ մենակ ազատագրել է Արցախը, էլի իրավունք չունի հանցագործություն կատարելու։ Ով ուզում ա լինի, շարքային երկրապահ լինի, կամ թեկուզ ԵԿՄ-ի նախագահը, եթե հանցագործություն է կատարում, ԵԿՄ-ն երբեք չի ասի, թե մարդը իրավունք ունի իր նախկին վաստակից ելնելով ինչ ուզի անի եւ անպատիժ մնա։ Երբեք չեք կարող փաստ բերել, որ ԵԿՄ-ն պաշտպանի հանցագործություն կատարածին ու ասի՝ մեր տղեն ա, նրան մի դատեք, բերեք։ Մենք իրավապահներին չենք խանգարում, ԵԿՄ-ն դրա համար չի»,-վստահեցրեց ԵԿՄ մամուլի խոսնակը։
Ի դեպ, ԵԿՄ նախագահ Մանվել Գորիգորյանը դեռեւս արձակուրդում է եւ կվերադառնա երկու օրից (նա արձակուրդ է մեկնել հուլիսի 14-ից՝ իր ծննդյան օրվանից)։ Սակայն Գրիգորյանն այս ընթացքում, ինչպես հավաստիացրեց Վարդան Վարդանյանը, մշտապես կապի մեջ է եղել եւ իր հրահանգները տվել ԵԿՄ-ի կողմից իրականացվող միջոցառումների առնչությամբ։
Հեղինե ՄանուկյանՆյութի աղբյուրը ` hraparak.am