Կարող էր նռնակը նետել մեկ այլ պաշտոնյայի տան վրա
ՔԱՂԱՔԱԿԱՆՈՒԹՅՈՒՆՌոբերտ Քոչարյանի տան ուղղությամբ նռնակ նետած 32-ամյա Հովհաննես Մուրադյանի (նկարում) հայրը` Սերգեյ Մուրադյանը, երեկ մեր թղթակցի հետ զրույցում տեղեկացրել է, որ որդին բողոքում էր իշխանություններից.
«Քոչարյանից բռնած՝ Սերժ Սարգսյանից, Լեւոն Տեր-Պետրոսյանից մինչեւ Ալիեւ ու Օբամա բողոքում էր: Բողոքում էր, թե էս ժողովրդին ինչ օրն եք գցում, ասում էր՝ մեր ջահել երեխեքին տանում են՝ կոտորում են, մի խոսքով...»,- ասել է հայրը:
Նա հայտարարել է, որ Ռոբերտ Քոչարյանի փոխարեն կարող էր լինել քաղաքական վերնախավի մեկ այլ ներկայացուցիչ: Սերգեյ Մուրադյանը նշել է, որ որդին, որը, հիշեցնենք, սույն գործով նախօրեին ձերբակալվեց, արդեն մի քանի տարի է, հոգեկան խնդիրներ ունի` տառապում է շիզոֆրենիա հիվանդությամբ եւ հաշվառված է Ավանի հոգեբուժարանում:
Հովհաննես Մուրադյանի ձերբակալությունից հետո հայրը հայտնաբերել է, որ որդին նշանակված դեղերը չի ընդունել, պահել է դրանք եւ համոզված է, որ դրա հետեւանքով նրա հիվանդությունը սրվել է: Նշենք, որ նռնակը ուսումնական է եղել, այսինքն, առանց պայթուցիկ նյութերի: Ֆունկցիոնալ իմաստով դա մի երկաթի կտոր է, որը մեծագույն ցանկության դեպքում պայթել չէր կարող: Հովհաննես Մուրադյանը նռնակը նետել է իր Վազ 2107 մակնիշի մեքենայից, որը հիմնականում շահագործվում է որպես տաքսի (նկարում):