Թուրքական հերթական ստոր մանևրները
ՔԱՂԱՔԱԿԱՆՈՒԹՅՈՒՆՀայաստանի պաշտպանության նախարարությունը հայտարարել է, որ Ադրբեջանն Արցախի Հանրապետության դեմ ագրեսիայի ռազմաօդային մասի կառավարումը հանձնել է Թուրքիային: Պաշտպանության նախարարությունը հայտնել է, թե ինչպես է իրականացվում կառավարումը Թուրքիայի տարածքից, հեռավար հրամանատարական օդային կետից: Ըստ հաղորդագրության, թուրքական երկու Ֆ-16 և ադրբեջանական ՍՈՒ-25-ները հարվածներ են հասցրել Հադրութի և Մարտունու շրջանի բնակավայրերին: Իրականում այս հաղորդագրությունը նշանակում է երկու բան՝ նախ Ադրբեջանը տապալվել է, ադրբեջանական զինուժ, որպես այդպիսին, գոյություն չունի, և Ադրբեջանն արդեն իսկ պարտվել է Արցախին:
Երկրորդն այն է, որ այդ փաստով ամրագրվում է, որ Արցախն այլևս կռվում է Թուրքիայի դեմ, ինչը նշանակում է արդեն ռազմա-քաղաքական իրադրության բոլորովին այլ մասշտաբ: Դա տեղի է ունենում դիվանագիտական բավականին կուլմինացիոն զարգացումներին զուգահեռ, երբ ավելի են հստակեցվում տարբեր հայտարարություններ միջազգային դերակատարներից: Այդ ֆոնին, Անկարան, փաստորեն տապալված Բաքվից, վերցնում է ագրեսիայի կառավարումը, ըստ ամենայնի՝ շտապելով հասնել որոշակի ռազմական առավելության, որպեսզի կանգ առնի ստիպված լինելու պարագայում և կարողանա դա վերածել քաղաքական գործընթացում պայման թելադրելու ռեսուրսի:
Մյուս հավանական տրամաբանությունը, թերևս, այն է, որ Թուրքիան փորձում է հակամարտության մեջ ներքաշել Հայաստանին և այդպիսով նաև Ռուսաստանին, այդպիսով ընդլայնելով պատերազմի մասշտաբը, հասցնելով այն ռեգիոնալի և բարձրացնելով քաղաքական սակարկության գինը: Հավելենք նաև, որ այս ամենը տեղի է ունենում Ֆրանսիայի նախագահ Էմանուել Մակրոնի հայտարարության ֆոնին, որ նա արել էր նախօրեին` միարժեք սատարելով հայկական կողմին, ում նախաձեռնությամբ նաև կայացավ երեկվա հայտարարությունը, որին բացի Մակրոնից միացել էին նաև Վլադիմիր Պուտինը և Դոնալդ Թրամփը։
Անդրանիկ Կիրակոսյան