Ղարաբաղի անկախության ճանաչման օրինագիծը ՀՀ Կառավարության առաջիկա նիստի օրակարգում է
ՔԱՂԱՔԱԿԱՆՈՒԹՅՈՒՆՀՀ կառավարության առաջիկա նիստի օրակարգում ընդգրկվել է ԱԺ պատգամավորներ Զարուհի Փոստանջյանի եւ Հրանտ Բագրատյանի կողմից ներկայացված «Արցախի Հանրապետությունը ճանաչելու մասին» օրենքի նախագիծը: Այդ նախագծի վերաբերյալ ՀՀ կառավարության եզրակացության նախագծում, սակայն, նշված չէ Կառավարության դիրքորոշումը, ինպես լինում է սովորաբար: Փոխարենը, տպավորությունն այնպիսին է, որ եզրակացությունը բացասական չէ:
Նախագծում ընդամենը Կառավարությանն առաջարկվում է հավանություն տալ «Արցախի Հանրապետությունը ճանաչելու մասին» ՀՀ օրենքի նախագծի վերաբերյալ Հայաստանի Հանրապետության կառավարության եզրակացության նախագծին եւ այն սահմանված կարգով ներկայացնել Հայաստանի Հանրապետության Ազգային ժողով»:
ԱԳՆ մամլո խոսնակ Տիգրան Բալայանին խնդրել ենք պարզաբանել՝ Կառավարության դիրքորոշման բացակայությունը ինչո՞վ է պայմանավորված: Մեր հարցին ի պատասխան ԱԳՆ մամլո խոսնակն ասաց. «Կառավարությունն իր դիրքորոշումը կարտահայտի»:
Մինչ այդ նշենք, որ ԱԺ-ին ուղղվելիք նախագծում ասվում է.
«Ձեզ ենք ներկայացնում Հայաստանի Հանրապետության կառավարության եզրակացությունը Հայաստանի Հանրապետության Ազգային ժողովի պատգամավորներ Զարուհի Փոստանջյանի և Հրանտ Բագրատյանի՝ օրենսդրական նախաձեռնության կարգով ներկայացրած «Արցախի Հանրապետությունը ճանաչելու մասին» Հայաստանի Հանրապետության օրենքի նախագծի վերաբերյալ: Հայաստանի Հանրապետության կառավարությունը ներկայացված օրենքի նախագծի ընդունումը պայմանավորում է Հայաստանի և Արցախի միջև քննարկումների արդյունքներով՝ հաշվի առնելով հետագա զարգացումները, այդ թվում նաև արտաքին գործոնները:
Միաժամանակ հայտնում ենք, որ, ներկայացված օրենքի նախագիծը Հայաստանի Հանրապետության Ազգային ժողովում քննարկելիս, հարակից զեկուցմամբ հանդես կգա Հայաստանի Հանրապետության արտաքին գործերի նախարարի տեղակալ Շավարշ Քոչարյանը»:
Զարուհի Փոստանջյանի եւ Հրանտ Բագրատյանի ներկայացրած նախագիծը բաղկացած է 2 հոդվածից: Առաջինով ՀՀ-ն ճանաչում է Արցախի Հանրապետությունը, երկրորդով որոշվում, էր որոշում ուժի մեջ է մտնում պաշտոնական հրապարակմանը հաջորդող օրը: