Սեյրան Օհանյանը դուրս է գրվել հոսպիտալից, վաղը կմասնակցի դատական նիստին
ՔԱՂԱՔԱԿԱՆՈՒԹՅՈՒՆՊաշտպանության նախկին նախարար Սեյրան Օհանյանը օրեր առաջ դուրս է գրվել Երևանի կենտրոնական զինվորական կլինիկական հոսպիտալից։ Լուրը Tert.am-ի հետ զրույցում հաստատեց Սեյրան Օհանյանը:
Նրա խոսքով՝ այս պահին տանը շարունակում է ամբուլատոր բուժումը: Դիտարկմանը, որ առողջական վիճակն արդեն թույլատրում է մասնակցել վաղվա դատական նիստին, Օհանյանը պատասխանեց.
«Եթե այսօր կամ գիշերն արտառոց ոչինչ տեղի չունենա, պատերազմ չսկսվի, կմասնակցեմ: Դատարանում 5 ժամ նստելը՝ երբեմն առանց ընդմիջման, այդքան էլ լավ չէ, ձանձրալի է: Եթե ամեն ինչ լավ անցնի, կանցնենք ակտիվ կյանքի»,- ասաց Օհանյանը:
Հիշեցնենք, որ «Մարտի 1»-ի գործով նախորդ երկու դատական նիստերը հետաձգվել էին՝ Սեյրան Օհանյանի առողջական խնդիրների հիմքով բացակայության պատճառով: