ԱՄՆ-ն միշտ էլ կարևոր դերակատարում է ունեցել Արցախի հարցում
ՔԱՂԱՔԱԿԱՆՈՒԹՅՈՒՆԱՄՆ-ի կողմից ցեղասպանությունը ինչ հեռանկարներ կտա Հայաստանին, ինչ դեր կունենա ԱՄՆ-ն Արցախի խնդրի լուծման գործում և Հայաստանի ներքաղաքական զարգացումների մասին 1or.am զրուցել է քաղաքագետ Արմեն Բաղդասարյանի հետ:
—ԱՄՆ–ի կողմից ցեղասպանության ճանաչումը ի՞նչ հեռանկարներ է ստեղծում Հայաստանի համար, մասնավորապես անվտանգության առումով։
— Ես չեմ կարծում, թե դրանից ռեալ ակնկալիքներ պետք է ունենալ։ Ամեն դեպքում կարծում եմ փոքր-ինչ դժվար կլինի քաղաքականացնել այդ ճանաչումը` կոնկրետ Արցախի հարցում։ Բայց տարածաշրջանային առումով, այո, գուցե ավելի կզսպի Թուրքիայի հավակնությունները, թուրքական ագրեսիվ նկրտումները։ Դա էլ չեմ կարծում, թե ավելի լուրջ բաներ կլինեն և չեմ կարծում, թե դա մեզ համար է արվել և այդ ճանաչման մեջ Հայաստանն ինչ-որ գործ ունի։ Դա ավելի շուտ ռուս-ամերիկյան, թուրք-ամերիկյան հարաբերությունների տիրույթում է։
—Տեսակետ կա, որ ԱՄՆ վարչակազմը ձգտում էր չմիջամտել Լեռնային Ղարաբաղում հակամարտությանը, բայց հիմա դառնում է լիարժեք խաղացող տարածաշրջանում և տարածում է իր ազդեցությունը ոչ միայն Սիրիայի քրդերի, այլ նաև Ղարաբաղում վիճելի տարածքների վրա։ Համամի՞տ եք։
— Ոչ համամիտ չեմ, որովհետև կարծում եմ, որ ԱՄՆ-ն միշտ էլ կարևոր դերակատարում է ունեցել Արցախի հարցում և ոչ թե փորձել է չմիջամտել։ Իմ տպավորությամբ իրավիճակը այսպիսին է՝ 44 օրյա պատերազմի արդյունքում Ռուսաստանը և Թուրքիան համատեղ մեծացրեցին իրենց ազդեցությունը Հարավային Կովկասում և ԱՄՆ-ն կարծես թե դուրս մնաց սրանից և հիմա փորձում է չեզոքացնել այդ ազդեցությունը և իր ծանրակշիռ ներկայությունը բերել այս անգամ ցեղասպանության ճանաչման միջոցով։ Բայց այնպես չի, որ դերակատարում չի ունեցել, ամեն դեպքում ԱՄՆ-ն գերտերություն է, աշխարհի հզորագույն երկիրն է, բացի այդ էլ Միսնկի խմբի համանախագահ երկիր է և չեմ կարող ասել, թե երբևէ հեռացած է եղել այս տարածաշրջանից։
—Նիկոլ Փաշինյանի հրաժարականից հետո, ըստ Ձեզ, ԱԺ ընդդիմադիր խմբակցությունները կպահե՞ն վարչապետի թեկնածու չառաջադրելու պայմանավորվածությունը, թե այնուամենայնիվ թեկանծու կառաջադրեն։
— Ամենայն հավանականությամբ կպահպանեն այդ պայմանավորվածությունը, որովհետև կարծում եմ, որ հնարավոր է դրանից բացի, այլ պայմանավորվածություններ էլ լինեն Նիկոլ Փաշինյանի հետ։
Սոնա Գիշյան