Ագրեսիայի դրսևորումների բնույթը փոփոխվում է, նպատակը՝ մեծացնել ճնշումը ՀՀ իշխանության վրա, կորզել առավելագույնը. Տ. Աբրահամյան
ՔԱՂԱՔԱԿԱՆՈՒԹՅՈՒՆԱԺ «Պատիվ ունեմ» դաշինքի պատգամավոր Տիգրան Աբրահամյանը ֆեյսբուքյան իր էջում գրառում է կատարել՝ անդրադառնալով ՀՀ ՊՆ-ի տարածած հաղորդագրությանը՝ Սոթքի ուղղությամբ հակառակորդի բացած կրակի մասին, և Արցախի ՊԲ-ի հայտարարությանը առ այն, որ Թաղավարդ համայնքի դիրքերի ուղղությամբ հակառակորդը սադրանքի է դիմել:
«ՊՆ-ն հաղորդում է Սոթքի դիրքերի հատվածում, գիշերը տեղի ունեցած 2 ժամ տևողությամբ ինտենսիվ փոխհրաձգության մասին։
Մեկ օր առաջ էլ ՊԲ-ն հաղորդեց Արցախի Թաղավարդ համայնքի դիրքերի ուղղությամբ իրականացված սադրանքի մասին, որի հետևանքով հայ զինծառայող է վիրավորվել։
Ագրեսիայի դրսևորումների աշխարհագրությունն ու բնույթը փոփոխվում են, իսկ նպատակը շարունակում է մնալ մեկը՝ մեծացնել ճնշումը Հայաստանի իշխանության վրա՝ կորզել առավելագույնը։
Ադրբեջանում համարում են, որ Հայաստանի այս որակի իշխանության պարագայում կարող են անընդհատ ճնշել և պարտադրել սեփական օրակարգը։
Իսկ ի՞նչ է անում իշխանությունը ստեղծված իրադրության պայմաններում, օրինակ՝ սադրանքներ է հրահրում Ազգային ժողովում, բռնության ալիք ծավալում ընդդիմադիր հայացքներ ունեցող անձանց նկատմամբ, խրախուսում ադրբեջանական գործողությունները և հասարակությանը նախապատրաստում նոր տարածքային կորուստների»,- գրել է Աբրահամյանը։