Ռոժինը պատմել է, թե ինչպես Ռուսաստանը կարող է օգնել Հայաստանին վերադարձնել գերիներին
ՔԱՂԱՔԱԿԱՆՈՒԹՅՈՒՆriafan.ru-ն գրում է, որ Ռուսաստանը կարող է հասնել իր նպատակներին ոչ միայն ուղղակիորեն, այլ նաև երրորդ կողմերի միջոցով՝ օգտագործելով իր դիվանագիտության տպավորիչ հնարավորությունները: Այդ մասին riafan.ru-ին տված հարցազրույցում ասել է «Կասսադ» տեղեկատվական-վերլուծական կենտրոնի գլխավոր խմբագիր Բորիս Ռոժինը:
ԱՄՆ-ի պետքարտուղար Էնթոնի Բլինկենը հեռախոսազրույց է ունեցել Հայաստանի վարչապետի պաշտոնակատար Նիկոլ Փաշինյանի հետ, որում նա խոստացել է շարունակել ջանքեր գործադրել Ադրբեջանից բոլոր հայ գերիներին վերադարձնելու համար: ԱՄՆ-ի արտգործնախարարը հույս է հայտնել նաև ԵԱՀԿ Մինսկի խմբի վերականգնման հարցում՝ նշելով խաղաղ գործընթացի հստակ օրակարգի մշակման ծայրահեղ կարևորությունը, որը թույլ կտա գտնել հակամարտության երկարաժամկետ լուծում:
«Մի շարք հայ ռազմագերիների խնդիրն այն է, որ Ադրբեջանը հրաժարվում է նրանց որպես այդպիսին համարել, - ասել է Ռոժինը,- փաստն այն է, որ նրանք գերեվարվել են Բաքվի և Երևանի միջև խաղաղության պայմանագիր կնքելուց հետո, ուստի ադրբեջանական կողմը նրանց համարում է ոչ թե ռազմագերիներ, այլ սադրիչներ և ահաբեկիչներ, որոնց պետք է դատել»:
Քաղաքագետը նշել է, որ համապատասխան քրեական հոդվածներով հայ զինվորներին կարող է սպառնալ 10-ից 15 տարվա ազատազրկում:
«Եվ դա, չնայած այն հանգամանքին, որ բոլորի համար ակնհայտ է, որ նրանք պարզապես ռազմական գործողությունների պաշտոնական ավարտից հետո գերի ընկած զինվորներ են, - ավելացրել է փորձագետը,- Բաքվի համար նրանք սակարկությունների և ճնշման ևս մեկ գործիք են սահմանազատման և Հայաստանի դեմ տարածքային պահանջների համատեքստում»:
Ռոժինը պատմել է նաև, թե ինչպես Ռուսաստանը կարող է օգնել Հայաստանին վերադարձնել գերևարված զինվորներին: riafan.ru-ի զրուցակիցը ասել է, որ երկու երկրների միջև լարվածությունը դեռ երկար կմնա, որի ընթացքում զինված հակամարտությունը կարող է նորից բռնկվել:
«Բայց ակնհայտ է, որ Հայաստանը կազմակերպական առումով պատրաստ չէ դրան, - շեշտել է Ռոժինը, - այնպես որ, նա պետք է շարունակի զիջումների գնալ, և վերջին խորհրդարանական ընտրություններում Փաշինյանի հաղթանակը դա երաշխավորում է: Այս պայմաններում միայն Անկարան կարող է ազդել Բաքվի վրա. այստեղ մենք կարող ենք հիշել, որ հենց Թուրքիայի միջոցով էին բանակցություններ վարվում Լիբիայում սոցիոլոգ Մաքսիմ Շուգալեյին ազատ արձակելու շուրջ, որն ավարտվեց հաջողությամբ»:
Քաղաքագետը համոզված է, որ ցանկության դեպքում Մոսկվան կարող է կրկնել այդ հնարքը և օգտագործել Անկարայի ազդեցությունը իր աշխարհաքաղաքական դաշնակցի վրա ճնշում գործադրելու համար: «Եթե Ռուսաստանը շատ շահագրգռված լինի, ապա կկարողանա հասնել Թուրքիայի միջոցով հայ ռազմագերիների ազատմանը՝ համաձայնվելով դրա դիմաց մեկ այլ բան տալուն, - ասել է փորձագետը,- ոչինչ անձնական, պարզապես բիզնես»:
Նյութը հրապարակման պատրաստեց Կամո Խաչիկյանը