Պետք է լինեն հասցեական, հստակ հայտարարություններ և ճնշումներ ադրբեջանական կողմի վրա
ՔԱՂԱՔԱԿԱՆՈՒԹՅՈՒՆՎերջերս հայ-ադրբեջանական սահմանին ադրբեջանցիների կողմից իրականացված սադրանքների հետևանքով ստեղծված իրադրությունը խաղաղ հանգուցալուծելու շուրջ բանակցություններ պետք է լինեին, որին ադրբեջանական կողմը հրաժարվեց ներկայանալ։
Այս թեմայով զրուցել ենք ռազմական փորձագետ, ադրբեջանագետ Տարոն Հովհաննիսյանի հետ։
Հարցին, թե ինչո՞ւ է Ադրբեջանը նման քաղաքականություն որդեգրել և ինչ նպատակ է հետապնդում մասնագետը պատասխանել է․ «Նման քայլերը բնորոշ է Ադրբեջանին: Ակնհայտ է, որ նրանք չեն ուզում խաղաղ ճանապարհով խնդիրը կարգավորել ու դուրս գալ ՀՀ-ի այն հատվածներից, որոնք փաստացի զավթել են: Քանի որ Հայաստանի համար անընդունելի է այս իրավիճակը, ստացվում է, որ Ադրբեջանի քայլերով իրավիճակը գնում է էսկալյացիայի»։
Անդրադառնալով այն հարցին, թե ՀԱՊԿ-ից, ԱՄՆ-ից, Ֆրանսիայից և ՀԱՊԿ անդամ մի շարք երկրներից հնչող կոչերից հետո էլ ադրբեջանական կողմը ինչո՞ւ որևէ քայլ չի գնում և տարածաշրջանային ի՞նչ զարգացումների կարող ենք սպասել՝ Տարոն Հովհաննիսյանը պատասխանել է․ «Այնպես չէ, որ ՀԱՊԿ-ից, Ռուսաստանից և ԱՄՆ-ից հասցեական, հստակ կոչեր ու պարտադրանք են հնչել, հետևաբար Ադրբեջանը իրեն կարող է թույլ տալ ձգձգել կամ փորձել հիմնավորվել ՀՀ տարածքներում: Կան իրավիճակը հանդարտեցնելու ինչ-որ երկկողմանի կոչեր, բայց իրավիճակը լարողն ադրբեջանական կողմն է, իրենք են մտել ՀՀ սուվերեն տարածք, հետևաբար խնդիրը չի կարող դիտարկվել երկու կողմերին ուղղված կոչերի մակարդակում: Պետք է լինեն հասցեական ու հստակ հայտարարություններ, ճնշումներ ադրբեջանական կողմի վրա, քանի դեռ դրանք չկան, իսկ դրանք մինչ օրս եղել են միայն Ֆրանսիայի կողմից, Ադրբեջանը կշարունակի իր գործելաոճը»։
Սոնա Գիշյան